کراچی: میٹرک بورڈآفس کے قریب شہری کی فائرنگ سے2 ڈاکوؤں کی ہلاکت کا واقعہ پیش آیا ہے، لاشوں کی شناخت کا عمل جاری ہے۔
تفصیلات کے مطابق شہر میں اسٹریٹ کرائمز سے عوام تنگ آچکے ہیں اور انھوں نے ڈکیتوں کے خلاف ایکشن لینا شروع کردیا ہے، میٹرک بورڈآفس کے قریب شہری نے اپنی حفاظت کے پیش نظر فائرنگ کردی جس سے 2 ڈاکو موقع پر ہی ہلاک ہوگئے۔
پولیس نے بتایا کہ شہری دانش نے دوران ڈکیتی مزاحمت کرتے ہوئے فائرنگ کرکے 2 ڈاکوؤں کو ہلاک کیا، ہلاک ڈاکوؤں کے قبضے سے اسلحہ ملا ہے جسے تحویل میں لےلیا گیا
ہلاک ڈاکوؤں کی لاشیں اسپتال منتقل کردی گئی ہیں، ان کی شناخت کاعمل جاری ہے، پولیس کا کہنا ہے کہ شہری کی مدعیت میں ضابطے کی کارروائی مکمل کی گئی، واقعے کا مقدمہ درج کیا جارہا ہے۔
دریں اثنا پولیس نے بتایا کہ کراچی کے علاقے اورنگی ٹاؤن میں بھی ڈکیتی مزاحمت پر فائرنگ کا واقعہ پیش آیا جس سے ایک شخص زخمی ہوا ہے۔
