ماہ رمضان میں روزے رکھنے کے سبب عام طور پر کولیسٹرول اور وزن میں کمی ہوجاتی ہے اور افطاری میں کھانے پینے میں احتیاط نہ کرنے سے اس کیفیت میں اضافہ ہوجاتا ہے۔
افطار میں مرغن غذاؤں کا زیادہ استعمال روزے کی جسمانی افادیت پر اثر انداز ہوتا ہے لہٰذا اس سے متعلق جاننا اور اسے متوازن سطح پر لانا نہایت ضروری ہے۔
اس حوالے سے ماہرین صحت کا کہنا ہے کہ سحری کے بعد شام تک کچھ بھی نہ کھانے پینے سے اضافی کیلوریز کے روٹین میں سے ختم ہوجانے کے سبب صحت بہتر اور وزن میں کمی آتی ہے۔
تاہم شام کو افطار میں کھانے پینے میں ہم کچھ غلطیاں کرجاتے ہیں جس کے نتیجے میں رمضان کا فائدہ اٹھانے اور صحت پہلے سے بہتر بنانے کے بجائے ہم اسے مزید بگاڑ لیتے ہیں۔
رمضان کے دوران ہر گھر میں مرغن غذاؤں اور گوشت، انڈے، دودھ، مکھن اور گھی وغیرہ کا استعمال باقاعدگی سے کیا جاتا ہے، اس صورت میں روزوں کے سبب وزن تو کم ہو رہا ہوتا ہے مگر خون میں منفی کولیسٹرول کی سطح بڑھ رہی ہوتی ہے جس پر بروقت قابو پانا چاہیے ورنہ صحت سے متعلق بڑے مسائل سے دو چار ہونے کے خدشات بڑھ جاتے ہیں۔
اس بے احتیاطی کے سبب انسان خود کو ترو تازہ اور بہتر محسوس کرنے کے بجائے بوجھل، تھکا ہوا، سُست محسوس کرتا ہے اور بد ہضمی، تیزابیت کا شکار بھی نظر آ تا ہے جو اس بات کا واضح اشارہ ہے کہ خون میں کولیسٹرول کی سطح بڑھ چکی ہے جس سے جِلد از جلد جان چھڑانا لازمی ہے۔
کولیسٹرول کم کرنے کے چند گھریلو ٹوٹکے
اگر آپ کے جسم میں برا کولیسٹرول زیادہ ہے تو آپ کچا لہسن صبح خالی پیٹ یا رات کو سونے سے پہلے کھائیں۔ لہسن میں ایلیسن نامی عنصر پایا جاتا ہے جو خراب کولیسٹرول کو کم کرتا ہے۔ لہسن کھانے سے بلڈ پریشر بھی کنٹرول ہوتا ہے۔
سبز چائے ہماری صحت کے لیے بہت فائدہ مند ہے، اس میں ایسے عناصر ہوتے ہیں جو صحت کے لیے اچھے ہوتے ہیں۔ روزانہ سبز چائے پینے سے میٹابولزم تیز ہوتا ہے اور کولیسٹرول کو کم کرنے میں مدد ملتی ہے۔ سبز چائے آپ کے وزن کو بھی کنٹرول کرتی ہے۔
السی کے بیجوں میں اومیگا تھری فیٹی ایسڈ پایا جاتا ہے جس کو اگر آپ پکا کر کھائیں تو بھی اور گرم پانی کے ساتھ نگل لیں تو بھی دونوں طرح سے کولیسٹرول کو بڑھنے سے روکنے میں مفید ہے۔
دھنیے میں فولک ایسڈ، وٹامن اے، سی، کے اور بیٹا کیروٹن پایا جاتا ہے جوکہ جسم میں اضافی فیٹ، کولیسٹرول اور ایل ڈی ایل بڑھنے نہیں دیتا۔ اس کو آپ رات سونے سے ایک گھنٹہ قبل گرم پانی کے ساتھ استعمال کریں یہ نظامِ ہاضمہ کو بھی بہتر بناتا ہے اور فیٹ کو کنٹرول کرتا ہے۔
وزن میں کمی کیسے کریں؟
پانی پینا میٹابولزم کو بڑھا سکتا ہے، بھوک کو کم کر سکتا ہے اور آپ کو پیٹ بھرنے میں مدد دیتا ہے، جس سے کیلوریز کی مقدار کم ہوتی ہے۔ دن میں کم از کم آٹھ گلاس پانی پیئں۔
فائبر خون میں شکر کی سطح کو منظم کرنے میں مدد کرتا ہے اور زیادہ کھانے کی عادت کو کم کرتا ہے۔ ہر کھانے میں زیادہ فائبر والی غذائیں جیسے پھل، سبزیاں اور اناج شامل کرنے پر غور کریں۔
پروٹینز بھوک کو کم کرتے ہیں اور وزن میں کمی کے دوران پٹھوں کو مضبوط رکھنے میں مدد دیتے ہیں۔ ہر کھانے میں چکن، مچھلی، بینز یا گریک یوگرٹ شامل کر سکتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
