کوئٹہ: کوئٹہ سے پشاور جانے والی جعفر ایکسپریس پر مچھ میں نامعلوم افراد کی فائرنگ سے ٹرین ڈرائیور زخمی ہو گیا ہے، جب کہ ٹرین کو روک لیا گیا ہے۔

ریلوے حکام کے مطابق مسلح افراد نے مچھ کے علاقے پیرو کنری کے قریب جعفر ایکسپریس پر فائرنگ کی، جس کی زد میں آ کر ٹرین کا ڈرائیور زخمی ہو گیا۔

ترجمان بلوچستان حکومت شاہد رند کا کہنا ہے کہ ایمرجنسی ریلیف ٹرین اور ایمبولینسیں جائے وقوع روانہ کر دی گئی ہیں، اور سبی کے اسپتالوں میں ایمرجنسی لگا دی گئی ہے، سیکیورٹی فورسز نے بھی علاقے کو گھیر لیا ہے۔ ترجمان نے کہا واقعے کی نوعیت اور ممکنہ دہشت گردی کے پہلوؤں کا جائزہ لیا جا رہا ہے۔

ریلوے حکام کا کہنا ہے کہ جعفر ایکسپریس میں 9 بوگیاں اور 500 مسافر سوار ہیں، وزیر ریلوے حنیف عباسی نے واقعے کی رپورٹ طلب کر لی ہے، کنٹرولر ریلوے محمد کاشف کے مطابق مسافروں اور عملے سے رابطے کی کوشش کی جا رہی ہے۔

ترجمان بلوچستان حکومت شاہد رند کے مطابق دشوار گزار علاقے کے باعث جائے وقوع تک رسائی میں مشکلات ہیں، بلوچستان حکومت نے ہنگامی اقدامات کی ہدایت کی ہے اور تمام ادارے متحرک ہیں۔