چیمپئنز ٹرافی کی جیت کا جشن منانے والے بھارتیوں کی خوشیوں میں رنگ کا بھنگ پڑ گیا پولیس نے انہیں گنجا کر کے سڑکوں پر گھما ڈالا۔
بھارت ریکارڈ تیسری بار آئی سی سی چیمپئنز ٹرافی جیتا ہے۔ اس کا جشن ملک کے طول وعرض میں جاری ہے۔ ریاست مدھیہ پردیش میں بھی لوگ اپنی ٹیم کی جیت کا جشن منا رہے تھے لیکن پولیس نے ان کے اس جشن کے رنگ میں بھنگ ڈال دیا۔
بھارتی میڈیا کے مطابق انڈین ٹیم کی فتح کی خوشی میں مدھیہ پردیش میں لوگ سڑکوں پر نکل کر جشن منا رہے تھے۔ اس موقع پر کچھ نوجوانوں نے ہلہ گلہ کرتے ہوئے آتشبازی کی۔
رپورٹ کے مطابق پولیس کے وہاں پہنچنے پر مستی سے چُور نوجوانوں نے اہلکاروں سے بدتمیزی کی جس پر پولیس نے جشن منانے والے ان تمام افراد (10) کو حراست میں لے کر پہلے ان کے سروں پر استرا چلوا کر گنجا کرا یا اور پھر شہر کی سڑکوں پر گشت کرایا۔
پولیس پر حملے اور کشیدگی پھیلنے کے الزام میں ان نوجوانوں کے خلاف نیشنل سیکیورٹی ایکٹ کی دفعات لگائی گئی ہیں اور ان دفعات کے تحت مزلم کو ایک سال تک قید کی سزا ہو سکتی ہے۔
اس سارے واقعے کی ویڈیوز سوشل میڈیا پر بھی وائرل ہوئیں جس کے بعد بی جے پی کے رکنِ اسمبلی نے ایس پی سے ملاقات کی اور کہا کہ یہ نوجوان ملک کے باقی حصوں کی طرح ٹیم کی جیت کا جشن منا رہے تھے، یہ عادی مجرم نہیں ہیں، ان کو اس طرح سڑک پر گھمانا ناجائز ہے۔
ایس پی پونیت گیہلوٹ کا کہنا ہے کہ وہ اس سارے معاملے کی تحقیقات کر رہے ہیں۔
انہوں نے کہا کہ ایڈیشنل ایس پی جیوئیر سنگھ بھاڈوریا کو مقررہ 7 روز میں انکوائری کی ذمہ داری سونپ دی گئی ہے اور جو بھی اس معاملے کے ذمہ دار ہیں ان کو مناسب سزا دی جائے گی۔
