موغادیشو: صومالیہ نے امریکا کو جواب دیتے ہوئے کہا ہے کہ اہل غزہ کو اپنے ہاں آباد کرنے کا منصوبہ مسترد کرتے ہیں۔
روئٹرز کے مطابق افریقی ملک صومالیہ کے وزیر خارجہ نے جمعہ کو کہا کہ صومالیہ کسی بھی ایسی تجویز کو مسترد کرتا ہے جس سے فلسطینی عوام کے ان کی آبائی سرزمین پر پرامن طریقے سے رہنے کے حق کو نقصان پہنچے۔
احمد معلم فقی کا کہنا تھا کہ صومالیہ کسی ایسے منصوبے کو مسترد کرتا ہے جس میں اس کی سرزمین کو دوسری آبادیوں کی آباد کاری کے لیے استعمال ہو۔
صومالیہ اور اس کے الگ ہونے والے علاقے صومالی لینڈ کے وزرائے خارجہ نے جعمہ کو کہا انھیں امریکا یا اسرائیل کی طرف سے ایسی کوئی تجویز موصول نہیں ہوئی ہے جس میں غزہ کی آبادی کی ان کے ہاں منتقلی کی تجویزدی گئی ہو، وزرائے خارجہ نے کہا کہ موغادیشو نے واضح طور پر اس طرح کے کسی بھی اقدام کو مسترد کر دیا ہے۔
امریکا اور اسرائیل کی نئی چال، فلسطینیوں کو افریقا میں بسانے کی تیاری
واضح رہے کہ متعدد امریکی اور اسرائیلی حکام نے یہ انکشاف کیا تھا کہ امریکا اور اسرائیل نے 3 مشرقی افریقی ممالک کے حکام سے رابطہ کیا ہے تاکہ ان سے غزہ کے فلسطینیوں کو ان کے ہاں آباد کرنے کے لیے بات کی جائے۔
ایسوسی ایٹڈ پریس نے امریکی اور اسرائیلی حکام کے حوالے سے بتایا تھا کہ ان کی حکومتوں نے سوڈان، صومالیہ اور صومالی لینڈ کے حکام سے رابطہ کیا ہے۔ تاہم روئٹرز کے مطابق صومالی وزیر خارجہ احمد معلم فقی نے ایسی کسی بھی تجویز کو یکسر مسترد کیا، جب کہ صومالی لینڈ کے وزیر خارجہ عبد الرحمن ظاہر ادان نے کہا ہے کہ مجھے اس حوالے سے کوئی تجویز موصول نہیں ہوئی اور نہ ہی فلسطینیوں کے حوالے سے کسی سے کوئی بات چیت ہوئی ہے۔
خیال رہے کہ ٹرمپ نے غزہ کے فلسطینیوں کی بے دخلی کا منصوبہ پیش کیا تھا جس پر عرب اور بین الاقوامی سطح پر بڑے پیمانے پر مذمت کی گئی۔ حالیہ دنوں امریکی صدر ٹرمپ نے اپنے اس منصوبے سے دست برداری اختیار کرتے ہوئے یہ بھی کہا ہے کہ غزہ کے فلسطینیوں کو کوئی بھی غزہ چھوڑنے پر مجبور نہیں کرے گا۔
