سندھ کے وزیر کھیل سردار محمد بخش مہر نے پاکستانی ٹیم کے کھلاڑیوں کی کارکردگی پر کڑی تنقید کی ہے۔
وزیر کھیل سندھ سردار محمد بخش مہر نے کورنگی ٹاؤن میں شہید محترمہ بے نظیر بھٹو رمضان کرکٹ ٹورنامنٹ کی تقریب سے خطاب میں کہا کہ کرکٹرز اگر حلوہ پوری، نہاری اور حلیم کھائیں گے تو کیسے کھیل پائیں گے؟۔
سردار محمد بخش مہر نے کہا کہ کرکٹرز کو اپنی ڈائٹ اور نیوٹریشن پربھی کام کرنا چاہیے، چیمپئنزٹرافی میں قومی ٹیم کی کارکردگی پر پوری قوم مایوس ہے، پڑوسی ملک چیمپئنز ٹرافی جیت گیا، قومی ٹیم نہ فائنل میں پہنچ سکی نہ فائنل ہم تک پہنچ سکا۔
سندھ کے وزیر کھیل نے کہا کہ ہمیں قومی کرکٹ ٹیم پر کافی محنت کرنےکی ضرورت ہے، کرکٹ میرے دائرہ اختیار میں نہیں لیکن اب مجھے ہی کرکٹ کے لئے کچھ کرنا پڑیگا، اپنے کھلاڑیوں کے لئے کچھ کرنے کی ضرورت ہے۔
انہوں نے کہا کہ کھلاڑیوں کو پیغام ہے کہ فٹنس ہے تو سب کچھ ہے، یہاں پر کچھ ایسے بھی بالرز ہے جس کو میں پانچ چھ چھکے مار سکتا ہوں اور کچھ ایسے بھی بیٹس مین ہیں جن کو میں بھی آرام سے آؤٹ کرسکتا ہوں۔
وزیر کھیل سندھ نے کہا کہ کسی زمانہ میں کورنگی میں چائنہ کٹنگ اور لینڈ گریبنگ عروج پر تھی، اب کورنگی میں کھیلوں کے ایونٹ دیکھ کر خوشی ہورہی ہے۔
سردار محمد بخش مہر کا کہنا تھا کہ سندھ حکومت ضلع کورنگی میں آئندہ سال کرکٹ سمیت مختلف کھیلوں کا انعقاد کرائے گی، کورنگی کے کرکٹ گراؤنڈ میں فلڈ لائٹس لگا کر دیں گے تاکہ نوجوان رات کو بھی کرکٹ کھیل سکیں۔
وزیر کھیل سندھ نے کورنگی میں شہید ذوالفقار علی بھٹو کرکٹ اکیڈمی اور جم کلب بنانے کا اعلان کیا ہے انہوں نے کہا کہ سندھ حکومت کورنگی میں کرکٹ اکیڈمی اور جم کلب بنائے گی۔
