امریکا نے یمن میں حماس اور حزب اللہ کے حامی ایران نواز حوثیوں پر مزید حملوں کا اعلان کر دیا۔
یمن پر امریکی فضائی حملوں کے بارے میں امریکی وزیر خارجہ مارکو روبیو نے سی بی ایس سے بات کرتے ہوئے کہ یمن میں امریکی فوجی مہم اس وقت تک جاری رہے گی جب تک حوثی بحری جہازوں کو نشانہ بنانے کی صلاحیت کھو نہیں دیتے۔
انہوں نے کہا کہ یمن میں حملے حوثیوں کی عالمی جہاز رانی، امریکی بحریہ پر حملہ کرنے کی صلاحیت کے بارے میں ہیں، ایسا کوئی طریقہ نہیں ہے کہ حوثیوں کے پاس جہاز رانی پر حملہ کرنے کی صلاحیت ہو جب تک انہیں ایران کی حمایت حاصل نہ ہو۔
البتہ انہوں نے یمن میں امریکی زمینی حملوں کی کوئی بات نہیں ہے۔
عرب میڈیا کے مطابق امریکا نے یمن کے دارالحکومت صنعا پر فضائی حملے کیے ہیں جس کے نتیجے میں کم از کم 24 افراد ہلاک اور متعدد زخمی ہوئے ہیں۔
غیر ملکی میڈیا رپورٹ کے مطابق امریکا نے دارالحکومت صنعا میں حوثیوں میزائل سسٹم، فضائی و دفاعی میزائل تنصیبات کو نشانہ بنایا۔
اس موقع پر امریکی صدر ڈونلڈ ٹرمپ نے سوشل میڈیا سائٹ پر کی گئی پوسٹ میں کہا کہ میں نے آج امریکی فوج کو حکم دیا ہے کہ وہ یمن کے حوثی دہشت گردوں کے خلاف فیصلہ کن اور طاقتور فوجی آپریشن شروع کرے۔
ٹرمپ نے خبردار کیا کہ حوثیوں کا وقت ختم ہوگیا، آج سے بحیرہ احمر پر حملے بند کرو ورنہ تمہارے ساتھ وہ ہوگا جو پہلے نہیں ہوا۔
انہوں نے ایران کو دہشت گردوں کی حمایت ترک کرنے کی وارننگ دیتے ہوئے کہا اگر حوثیوں کی حمایت ترک نہ کی تو حملوں کا ذمے دار ٹھہرایا جائے گا۔
دوسری جانب حوثیوں کا کہنا ہے امریکا کے حملوں کا بھرپور جواب دیں گے۔
