کوئٹہ : ایئرپورٹ روڈ پر فائرنگ سے معروف عالم دین مفتی عبد الباقی جاں بحق ہوگئے، مقتول تراویح پڑھنے کیلئے مسجد جارہے تھے۔
تفصیلات کے مطابق کوئٹہ کے ایئرپورٹ روڈ پر نامعلوم مسلح افراد کی فائرنگ سے عالم دین مفتی عبد الباقی شدید زخمی ہوگئے جنہیں تشویشناک حالت میں طبی امداد کیلیے فوری طور پر سول اسپتال منتقل کیا گیا۔
اس حوالے سے پولیس حکام کا کہنا ہے کہ مفتی عبدالباقی کو تراویح کیلئے مسجد جاتے ہوئے حملہ آوروں نے اپنی گولیوں کا نشانہ بنایا۔
پولیس کے مطابق سول اسپتال میں دوران علاج زخموں کی تاب نہ لاتے ہوئے زیادہ خون بہہ جانے کے باعث مفتی عبدالباقی نے دم توڑ دیا۔
پولیس حکام کے مطابق فائرنگ کے واقعہ کے فوری بعد پولیس کی بھاری نفری جائے وقوعہ پر پہنچ گئی، ملزمان کی گرفتاری کیلئے علاقے کی ناکہ بندی کرکے ملزمان کی تلاش شروع کردی گئی۔
تازہ ترین اطلاعات کے مطابق اب تک کوئی گرفتاری عمل میں نہیں آسکی تاہم تمام زاویوں سے واقعہ کی مزید تحقیقات کی جارہی ہیں۔
مزید پڑھیں : داماد کی فائرنگ سے 2 سالیاں قتل، بیوی زخمی
واضح رہے کہ گزشتہ روز چنیوٹ میں گھریلو تنازع پر داماد کی سسرال والوں پر فائرنگ کے نتیجے میں دو سالیاں جاں بحق اور بیوی زخمی ہوگئی، ملزم رستم کی بدسلوکی کے باعث اس کی بیوی اسے چھوڑ کر 2 بچوں سمیت میکے آئی تھی۔
پولیس کے مطابق واقعہ محلہ پورن پلاد میں پیش آیا تاہم زخمی خاتون کو تشویشناک حالت میں الائیڈ اسپتال فیصل آباد بھجوادیا گیا ہے اور واقعہ کی تحقیقات جاری ہے اور گرفتاری کیلئے چھاپے مارے جارہے ہیں۔
