فیصل آباد : وزیراعظم کے مشیر رانا ثناء اللہ نے واضح کیا بلوچستان میں کسی گرینڈ آپریشن کی ضرورت نہیں اور پاک فوج کا کوئی جوان دہشت گردوں کی حراست میں نہیں۔
تفصیلات کے مطابق وزیراعظم کے مشیر رانا ثناء اللہ جعفر ایکسپریس سانحے میں شہید پاک فوج کے جوان مزمل حسین کے فیصل آباد میں آبائی گھر گئے، لواحقین سے اظہار تعزیت اور فاتحہ خوانی کی ۔
اس موقع پر میڈیا سے گفتگو کرتے ہوئے رانا ثناء اللہ نے کہا کہ جعفر ایکسپریس کا واقعہ انتہائی قابل مذمت ہے، دہشت گردوں کا کوئی دین ایمان نہیں ہے، مسافروں کو شہید کیا گیا ، یہ دہشت گرد کسی رعایت کے مستحق نہیں۔
وزیراعظم کے مشیر کا کہنا تھا کہ دہشت گردی کی کارروائیوں کا کوئی جواز نہیں پیش کیا جا سکتا، ایک سیاسی جماعت کے سوشل میڈیا نے وہی پراپیگنڈا کیا جو انڈین میڈیا کر رہا تھا۔
انھوں نے کہا کہ جعفر ایکسپریس کا واقعہ ہوتے ہیں انڈین میڈیا نے شور و واویلا شروع کردیا ، یوں لگتا ہے جیسے انڈین میڈیا اور مخصوص سیاسی جماعت کو اس حملے کا پتا تھا۔
سیاسی مشیر کا کہنا تھا کہ اس میں کوئی شک نہیں کہ پاکستان میں ہونے والی دہشت گردی میں را کا ہاتھ ہے ، سب دہشت گردوں کی ماں انڈین ایجنسی را ہے، فنڈنگ اور اسلحہ بھی وہیں سے آتا ہے لیکن پوری قوم کو اپنے شہداء اور غازیوں کے ساتھ کھڑے ہونا چاہئے۔
انھوں نے مزید کہا ہم نے ہمسایہ ملک افغانستان کی ماضی میں بہت مدد کی ہے لیکن وہاں کی حکومت دہشت گردوں کی سہولت کار ہے.
انھوں نے بتایا کہ بلوچستان میں پہلے سے انٹیلیجنس بیسڈ کارروائیاں کی جا رہی ہیں ۔ روزانہ کی بنیاد پر بیسیوں آپریشن ہو رہے ہیں، دہشتگردوں کو جہنم واصل کیا جا رہا ہے، دہشتگرد جلد نیست و نابود ہوں گے ۔
رانا ثناء نے واضح کیا کہ پاک فوج کا کوئی جوان دہشت گردوں کی حراست میں نہیں ہے، واقعہ کے بعد چند گھنٹے میں مسلح افواج نے دہشت گردوں کا خاتمہ کر دیا، جائے وقوعہ سب کے لئے کھلا ہے ، کوئی بھی وہاں جا کر دیکھ سکتا ہے۔
