اسلام آباد : جعفر ایکسپریس حملے کے دوران ریاستی اداروں کیخلاف نفرت انگیز مہم چلانے والے ملزم کو بنی گالہ سے گرفتار کرلیا گیا۔
تفصیلات کے مطابق وفاقی تحقیقاتی ادارے ( ایف آئی اے) نے کارروائی کرتے ہوئے ریاستی اداروں کیخلاف نفرت انگیز مہم چلانے والے ملزم کو گرفتار کرلیا۔
ترجمان نے بتایا کہ ملزم حیدر سعید کوبنی گالہ سے گرفتار کیا گیا، ملزم نے سانحہ جعفرایکسپریس کے دوران اداروں کیخلاف منفی پروپیگنڈا اور تضحیک آمیز مواد شیئر کیا۔
ایف آئی اے کا کہنا تھا کہ ملزم سوشل میڈیا پر کالعدم تنظیموں کی حمایت اور تشہیر میں بھی ملوث پایا گیا۔
ترجمان نے کہا کہ ملزم دہشت گردوں کے حق میں اشتعال انگیز بیانات اور مواد بھی شیئر کرتا رہا۔
مزید پڑھیں : جعفر ایکسپریس حملہ: اداروں کیخلاف ہرزہ سرائی پر پیکا ایکٹ کے تحت 3 مقدمات درج
ملزم کے سوشل میڈیا اکاؤنٹس اور ڈیجیٹل شواہد قبضے میں لے کر تحقیقات کا آغاز کر دیا ہے، ملزم کیخلاف قانون کے مطابق سخت کارروائی کی جائے گی۔
یاد رہے چند روز قبل جعفر ایکسپریس حملے کے بعد قومی اداروں کے خلاف ہرزہ سرائی پر وفاقی تحقیقات ایجنسی (ایف آئی اے) سائبر کرائم اسلام آباد نے 3 مقدمات درج کئے تھے۔
ایف آئی اے نے مقدمات پیکا ایکٹ کے تحت صحافی احمد نورانی، شفیق احمد ایڈووکیٹ اور آئینہ درخانی کے خلاف درج کیے، ان پر الزام ہے کہ انہوں نے پروپیگنڈے کے ذریعے عوام کو اداروں کے خلاف بھڑکایا اور کالعدم تنظیموں کو پروموٹ کرنے کی کوشش کی۔
