اورنگ آباد: بھارتی ریاست مہاراشٹر میں مغل شہنشاہ اورنگزیب عالمگیر کا تاریخی مقبرہ بالی ووڈ فلم چھایا کی ریلیز کے بعد خطرے میں پڑ گیا ہے۔
بھارتی میڈیا رپورٹس کے مطابق بھارت کی انتہا پسند ہندو تنظیموں نے حکومت کو سخت وارننگ دیتے ہوئے کہا ہے کہ اورنگزیب کی قبر ہٹاؤ ورنہ اسے کار سیوک ہٹا دیں گے۔‘‘
بالی ووڈ فلم چھایا کی ریلیز کے بعد ریاست مہاراشٹر میں مغل بادشاہ اورنگزیب کو لے کر انتہا پسند ہندوؤں نے ہنگامہ آرائی شروع کر دی ہے، اور وہ ان کا مقبرہ ہٹانے کا مطالبہ کر رہے ہیں۔
حالیہ دھمکی میں شدت پسند ہندو تنظیم نے وارننگ دیتے ہوئے کہا ہے کہ قبر کو جلد ہٹایا جائے نہیں تو ایودھیا کی طرح اسے بھی کار سیوک ہٹا دیں گے، خیال رہے کہ مقبرے کو ہٹانے کے لیے وی ایچ پی اور بجرنگ دل نے آج مہم شروع کرنے کا اعلان بھی کیا ہے۔
بھارت میں انتہا پسندی، مغل شہنشاہ اورنگزیب کے مقبرے پر فوج تعینات کر دی گئی
بجرنگ دل کے سمبھا جی نگر کے رہنما نتن مہاجن نے ہرزہ سرائی کرتے ہوئے کہا ’’اورنگ زیب نے لاکھوں قتل کیے، کاشی اور متھرا کے مندر سمیت ہزاروں مندر توڑے، لاکھوں گایوں کا قتل کیا، ظالم حکمراں کی تعریف و توصیف کرنے کا کام برداشت نہیں کیا جائے گا۔‘‘ انھوں نے دھمکی دی کہ اگر قبر نہیں ہٹائی گئی تو وہ بابری مسجد کی طرز پر خود اسے ہٹا دیں گے۔
انتہا پسند ہندو تنظیموں کے احتجاج کی وجہ سے خلد آباد میں اورنگزیب کی قبر کی سیکیورٹی بڑھا دی گئی ہے، پولیس کی نفری کے ساتھ ساتھ فوج بھی تعینات کی گئی ہے، اور آنے جانے والوں پر نظر رکھی جا رہی ہے۔
