لاہور : جماعت اسلامی نے غزہ میں جاری امریکا اور اسرائیل کی دہشت گردی اور سفاکانہ کارروائیوں کیخلاف جمعہ کو ملک گیر احتجاج کا اعلان کردیا۔
اس حوالے سے جماعت اسلامی پاکستان کے امیر حافظ نعیم الرحمان نے کہا ہے کہ امریکا کی سرپرستی میں فلسطین میں ہونے والے اسرائیلی مظالم کے خلاف ملک گیر احتجاج کیا جائے گا۔
گزشتہ روز غزہ پر اسرائیلی فوج کے وحشیانہ فضائی حملوں کی مذمت کرتے ہوئے ان کا کہنا ہے کہ صہیونیوں نے غزہ میں تاریخ انسانی کی بدترین فسطائیت کی ہے۔
امیرجماعت اسلامی پاکستان نے کہا کہ غزہ میں 48 ہزار فلسطینیوں جن میں بڑی تعداد بچوں اور خواتین کی ہے انہیں شہید کیا گیا، ہزاروں لوگ ملبے تلے دبے ہیں، اب تک زخمیوں کی تعداد کئی لاکھ ہوچکی ہے۔
حافظ نعیم الرحمان نے کہا کہ غزہ میں خوراک اور ادویات کا شدید بحران ہے، جمعہ کو احتجاج میں ملک کے تمام چھوٹے بڑے شہروں میں ریلیاں نکالی جائیں گی، تمام پاکستانیوں سے اپیل ہے مظاہروں میں شرکت یقینی بنائیں۔
