رمضان المبارک کے مقدس مہینے میں پیشہ ور بھیک مانگنے والوں کی چاندی ہوگئی ہے اور وہ فی گھنٹہ 28 ہزار روپے تک کما رہے ہیں۔
دنیا بھر میں مسلمانوں کا مقدس مہینہ رمضان المبارک جاری ہے۔ اس ماہ میں جہاں مسلمان روزہ رکھنے کے ساتھ عبادات کا سلسلہ بڑھا دیتے ہیں، وہیں راہ خدا میں دل کھول کر خرچ کرتے ہوئے صدقہ اور خیرات کرتے ہیں۔
ماہ رمضان پیشہ ور بھکاریوں کے لیے کمائی کا ایسا سیزن بن گیا ہے کہ وہ فی گھنٹہ ہزاروں روپے کمانے لگے ہیں۔
پاکستان کے ساتھ سعودی عرب، متحدہ عرب امارات بھی پیشہ ور بھکاریوں کے لیے جنت بن جاتے ہیں۔ یو اے ای میں شارجہ پولیس نے بتایا ہے کہ بھکاری ایک گھنٹے میں 367 درہم (پاکستانی لگ بھگ 28 ہزار روپے) تک کما رہے ہیں۔
امارات الیوم کے مطابق اماراتی پولیس نے اس حوالے سے ایک مشق کی جس میں ایک اہلکار کو بھکاری بنا کرسڑکوں پرگھمایا۔ اس نقلی بھکاری نے صرف ایک گھنٹے میں 367 امارتی درہم بھیک میں حاصل کیے۔
ویڈیو میں دیکھا جا سکتا ہے کہ وہ شخص سڑک پر بھیک مانگ رہا ہے،راہگیر اس کی مدد کے لیے رقم دے رہے ہیں۔ پولیس نے شہریوں سے اپیل کی کہ وہ ایسے افراد کو رقم نہ دیں بلکہ مستند فلاحی اداروں کے ذریعے عطیات دیں۔
اماراتی پولیس نے اپنے آگہی بیان میں کہا ہے کہ پیشہ ور گداگر ماہ رمضان کو اپنے مفاد کے لیے استعمال کرتے ہیں۔ لوگ خیرات ایسے اداروں کو دیں جو حقیقی ضرورت مندوں کی امداد کے کام کرتی ہیں تاکہ دی گئی رقم پیشہ ور گداگروں کے ہاتھوں میں نہ جائے۔
