کراچی : عید کی تعطیلات کے بعد ایک اور عام تعطیل کا اعلان کردیا گیا ، 4 اپریل کو تمام سرکاری دفاتر اور تعلیمی ادارے بند رہیں گے۔
تفصیلات کے مطابق سندھ حکومت نے سابق وزیر اعظم اور پاکستان پیپلز پارٹی (پی پی پی) کے بانی ذوالفقار علی بھٹو کی برسی کی یاد میں 4 اپریل کو عام تعطیل کا اعلان کیا ہے۔
صوبائی حکومت کی جانب سے جاری کردہ نوٹیفکیشن میں کہا گیا ہے کہ تمام سرکاری دفاتر، خود مختار ادارے اور تعلیمی ادارے بند رہیں گے۔
یہ اعلان عید الفطر کی تعطیلات کے فوراً بعد سامنے آیا ہے، جو صوبے میں 2 اپریل کو ختم ہونے والی ہیں۔
یاد رہے مرحوم رہنما کو خراج عقیدت پیش کرتے ہوئے صدر آصف علی زرداری نے اتوار کو بھٹو کو ملک کے سب سے بڑے سول اعزاز نشان پاکستان سے نوازا تھا۔
یہ ایوارڈ ایوان صدر میں منعقدہ ایک تقریب میں دیا گیا، جہاں بھٹو کی صاحبزادی صنم بھٹو نے ان کی جانب سے وصول کیا تھا۔
خیال رہے 1973 سے 1977 تک پاکستان کے وزیراعظم رہنے والے ذوالفقار علی بھٹو کو ایک متنازعہ مقدمے کے بعد 4 اپریل 1979 کو پھانسی دے دی گئی تھی۔
