ویڈیو رپورٹ: محمد عرفان مغل
ڈیرہ اسماعیل خان… ایک ایسا تاریخی شہر، جو اپنی ثقافت، روایات کے ساتھ ساتھ دستکاری کے انمول فن کا امین ہے، یہاں کے ہاتھ سے بنے جوتے اپنی بناوٹ، دل کشی اور پائیداری کے سبب ایک منفرد مقام رکھتے ہیں۔ ہاتھ سے بنے یہ جوتے فن اور مہارت کا وہ شاہکار ہیں جو صدیوں پرانی روایت کو زندہ رکھے ہوئے ہیں۔ مقامی طور پر ’’کھیڑی والی جوتی‘‘ اور ’’تلے والی جوتی‘‘ کے نام سے پہچانے جانے والے یہ جوتے اپنی مضبوطی، نفاست اور آرام دہ ساخت کے باعث پورے ملک میں مقبول ہیں، بلکہ ان کی شہرت سرحد پار بھی جا پہنچی ہے۔
یہ جوتے محض فیشن کا حصہ نہیں بلکہ ہماری ثقافت کی پہچان ہیں، جو نسل در نسل منتقل ہو رہی ہے، بدقسمتی سے مشینی دور نے اس نایاب ہنر کو محدود کر دیا ہے، اور اب صرف چند ماہر کاریگر ہی اس روایت کو زندہ رکھے ہوئے ہیں۔ یہ دیدہ زیب جوتے ہر عمر کے افراد میں یکساں مقبول ہیں۔ خواتین کے لیے خصوصی ڈیزائن بھی تیار کیے جاتے ہیں، جو ان کی شخصیت کو مزید جاذبِ نظر بنا دیتے ہیں۔
