مصر کی ایک مسجد میں نماز تہجد کے دوران اچانک بھگدڑ مچ گئی 8 سالہ بچی جاں بحق جب کہ کئی خواتین زخمی ہو گئیں۔
عرب میڈیا کے مطابق یہ افسوسناک واقعہ مصر کے صوبے اقصر کے علاقے العوامیہ میں منگل کو علی الصبح مسجد العتیق میں پیش آیا جہاں تہجد کی نماز کے دوران اچانک بھگدڑ مچ گئی۔
عینی شاہدین کے حوالے سے رپورٹ کیا گیا ہے کہ نماز تہجد کے دوران مسجد کے قریب آنگن سے دھواں اٹھنے کی وجہ سے خواتین یہ سمجھیں کہ مسجد میں آگ لگ گئی ہے۔
آتشزدگی کے خوف سے خواتین کے درمیان بھگدڑ مچ گئی اور وہ جلد از جلد مسجد سے باہر نکلنے کی کوشش کرنے لگیں۔
اسی بھگدڑ کے دوران 8 سالہ بچی کچل کا جاں بحق ہوگئی جب کہ کئی خواتین زخمی ہوئیں جب کہ درجنوں دم گھٹنے کے باعث بے ہوش ہو گئیں۔
واقعے کی اطلاع ملتے ہیں ریسکیو ادارے جائے وقوعہ پر پہنچ گئے اور زخمیوں کو علاج کے لیے قریبی اسپتال منتقل کیا۔
سیکیورٹی حکام نے واقعے کی تحقیقات کا آغاز کر دیا ہے جب کہ حکام نے مسجد اور اطراف کا جائزہ لینے کے بعد تصدیق کی کہ مسجد کے اندر کوئی آگ نہیں لگی تھی بلکہ نظر آنے دھواں قریب لگائے گئے کچرا جلائے جانے سے اٹھا تھا۔
