کراچی کے علاقے کارساز روڈ پر کار کی ٹکر سے موٹر سائیکل سوار میاں اور بیوی جاں بحق ہوگئے۔
اے آر وائی نیوز کے مطابق ریسکیو حکام کا کہنا ہے کہ جاں بحق مرد کی عمر 30 اور خاتون کی عمر 25 سال ہے، حادثے کے بعد موقع پر موجود شہریوں نے کار ڈرائیور کو پکڑ لیا۔
مشتعل شہریوں نے ڈرائیور کو تشدد کا نشانہ بنایا اس موقع پر پولیس پہنچ گئی۔
ریسکیو حکام کا کہنا ہے کہ پولیس کو ڈرائیور کو تحویل میں لے لیا لیکن مشتعل شہری جانے نہیں دے رہے اور موبائل کو بھی گھیر لیا۔
واضح رہے کہ دو روز قبل کراچی کے علاقے ملیر ہالٹ میں رانگ سائیڈ سے آنے والے واٹٓر ٹینکر سے موٹر سائیکل پر سوار میاں اور حاملہ بیوی کو کچل دیا تھا۔
خوفناک حادثے میں میاں ، بیوی اور نومولود بچہ جاں بحق ہوگئے تھے ، جس کے بعد مشتعل شہریوں نے واٹر ٹینکر کے شیشے توڑ ڈالے، ڈرائیور کوبھی تشدد کانشانہ بناکرپولیس کے حوالے کردیا۔
جاں بحق میاں بیوی کی شناخت عبد القیوم اور زینب کے نام سے ہوئی تھی ، جاں بحق نوجوان سرکاری ملازم تھا اور کوہی گوٹھ لانڈھی کےاسپتال سے اہلیہ کامعائنہ کروا کر واپس آرہا تھا۔
