ملک میں سونے کی قیمتیں آسمان پر پہنچ گئی ہیں، پاکستان بھر میں سونا نئی تاریخی بلند سطح پر پہنچ گیا۔

آل پاکستان جیمز اینڈ جیولرز ایسوسی ایشن کے مطابق ملک میں فی تولہ سونے کی قیمت یکمشت 3200 روپے کے بڑے اضافے سے 3 لاکھ 21 ہزار روپے کی تاریخی سطح پر پہنچ گئی ہے۔

10 گرام سونے کی قیمت میں 2743 روپے کا اضافہ ہوا ہے، جس سے دس گرام سونا 2 لاکھ 75 ہزار 205 روپے کی بلند سطح پر پہنچ گیا ہے۔

عالمی صرافہ بازار میں فی اونس سونا 31 ڈالرز اضافے سے 3052 ڈالرز کی ریکارڈ سطح پر پہنچ گیا ہے، جب کہ چاندی کی فی تولہ قیمت 105 روپے اضافے سے 3580 روپے ہو گئی ہے۔

پاکستان میں آج ڈالر اور دیگر کرنسیوں کی قیمت

واضح رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔ اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔

پاکستان میں گزشتہ برس سونے کی قیمت کے تعین کے طریقہ کار میں تبدیلی کی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔