خیبر پختونخوا میں سیکیورٹی فورسز نے کارروائیاں کرتے ہوئے 11 خوارج کو ہلاک کردیا، صرف میرعلی، میرانشاہ، ڈیرہ اسماعیل خان میں کارروائی کی گئی۔
تفصیلات کے مطابق آئی ایس پی آر کی جانب سے جاری بیان میں بتایا گیا کہ شمالی وزیرستان کے علاقے میرعلی میں آپریشن کیا گیا جس میں 5 خوارج جہنم واصل ہوئے، میرعلی میں دوسری کارروائی میں فورسز نے 3 مزید خوارج ہلاک کردیے۔
آئی ایس پی آر نے بتایا کہ میرانشاہ میں جھڑپ ہوئی، سیکیورٹی فورسز نے 2 خوارج کو انجام تک پہنچایا، ڈیرہ اسماعیل خان کے علاقے درابن میں آپریشن میں ایک خوارج ہلاک ہوا۔
ہلاک ہونے والے خوارج سے اسلحہ اور گولہ بارود برآمد کرلیا گیا، سیکیورٹی فورسز کی جانب سے علاقے میں کلیئرنس آپریشن جاری ہے۔
جاری بیان میں آئی ایس پی آر کا مزید کہنا تھا کہ پاکستان سے دہشت گردی کے خاتمے کےلیے سیکیورٹی فورسز پُرعزم ہیں۔
