وزیر اعلیٰ خیبر پختونخوا علی امین گنڈاپور نے نیشنل فنانس کمیشن (این ایف سی) ایوارڈ کے لیے سڑکوں پر نکلنے کی دھمکی دے دی ہے۔
وزیر اعلیٰ خیبر پختونخوا علی امین گنڈاپور نے کے پی ہاؤس اسلام آباد میں پریس کانفرنس کرتے ہوئے کہا ہے کہ آئین ہمیں این ایف سی کے مطابق حق دیتا ہے۔ این ایف سی ایوارڈ میں خیبر پختونخوا کوجو حق ہے، وفاقی وہ فوریطور پر ہمارے حوالے کرے بصورت دیگر اس معاملکے پر سڑکوں پر بھی نکلیں گے۔
علی امین گنڈاپورنے واضح کیا کہ این ایف سی کے مطابق جو فنڈ کے پی کا حق ہے وہ لے کر رہوں گا۔
ان کا کہنا تھا کہ بطور وزیراعلیٰ میرا اختیار ہے کہ میں کسی بھی جیل میں قیدی سےملاقات کر سکتا ہوں لیکن بانی پی ٹی آئی عمران خان سے جیل میں ملاقات کے لیے مجھے دو ماہ انتظار کرنا پڑتا ہے۔
وزیراعلیٰ کے پی نے دوٹوک کہا کہ عمران خان ایک مقصد اور نظریے کے لیے غیر قانونی طور پر جیل میں ہیں اور وہ کبھی بھی ڈیل کر کے باہر نہیں آئیں گے۔
علی امین گنڈاپور نے بتایا کہ بانی پی ٹی آئی سے ملاقات میں دہشتگردی سمیت سرحد کی صورتحال پر بھی گفتگو ہوئی۔ پی ٹی آئی کو ختم کرنےکے لیے پورا زور لگایا گیا، عمران خان کی جس طرح حکومت ہٹائی گئی،اس پر تحفظات ہیں۔ میں بانی پی ٹی آئی کی جنگ لڑ رہا ہوںح اور جو مجھ سے ہو سکے گا وہ کروں گا۔ دعاگو ہوں صدر آصف زرداری جلد صحتیاب ہوں۔
