کراچی: گورنر سندھ کامران ٹیسوری کی جانب سے وزیر اعظم شہباز شریف کو 100 ارب روپے کی گرانٹ کیلیے خط لکھنے پر میئر کراچی مرتضیٰ وہاب نے ردعمل دے دیا۔
سندھ ہائیکورٹ کے باہر میڈیا سے گفتگو کرتے ہوئے مرتضیٰ وہاب نے کہا کہ میرے کہنے پر گورنر سندھ نے بالآخر خط لکھ دیا ہے لیکن میں نے ہر پریس کانفرنس میں کہا کہ صرف خط لکھنے سے کام نہیں چلے گا۔
میئر کراچی نے کہا کہ شکر گزار ہوں کامران ٹیسوری نے خط لکھا ہے مگر یہ ابھی آدھا کام ہوا ہے، جب تک کے ایم سی کے اکاؤنٹ میں پیسے منتقل نہیں ہوتے کام مکمل نہیں ہوگا۔
یہ بھی پڑھیں: 100 ارب منتقل کرائیں، سحری، افطاری کرانے سے مسائل حل نہیں ہوتے، میئر کراچی
مرتضیٰ وہاب نے کہا کہ گورنر سندھ میرے بھائی ہیں اور میرا ان سے ذاتی رشتہ ہے، آئینی و قانونی اعتبار سے گورنر کا جو اختیار ہے وہ گورنر کرے اور حکومت کا جو ہے وہ حکومت کرے۔
’کامران ٹیسوری کہتے ہیں کہ وہ وفاق کے نمائندے ہیں اور وفاق سے تمام اختیار لے کر دے سکتے ہیں۔ ان کے کہنے پر ہی ان سے بات کی تھی میری بات کو ناراضگی نہ سمجھا جائے۔
صحافی نے سوال کیا کہ گورنر سندھ تو خود ٹریفک و دیگر اختیارات مانگ رہے ہیں۔ اس پر میئر کراچی نے جواب دیا کہ پھر ان کو اختیار دینے کی بات ہی نہیں کرنی چاہیے تھی۔
گزشتہ روز گورنر سندھ نے وزیر اعظم شہباز شریف کو خط لکھا تھا جس میں انہوں نے شہر قائد کے ترقیاتی منصوبوں کیلیے 100 ارب اروپے کی گرانٹ کا مطالبہ کیا تھا۔
انہوں نے مئیر کراچی مرتضیٰ وہاب کی جانب سے منصوبوں کی فہرست بھی وزیر اعظم کو ارسال کی تھی۔
یاد رہے کہ گورنر سندھ نے افطار ڈنر کے موقع پر گفتگو کرتے ہوئے مرتضیٰ وہاب کو چیلنج دیا تھا کہ میئر کراچی کل 100 ارب روپے کے ترقیاتی منصوبوں کی سمری میرے پاس لائیں تو میں وفاق سے انہیں یہ رقم دلوا دوں گا۔
