پاک فوج کے سربراہ جنرل عاصم منیر نے کہا ہے کہ پاکستان عالمی معدنی معیشت میں رہنما کے طور پر ابھرنے کو تیار ہے۔
اے آر وائی نیوز کے مطابق اسلام آباد میں پاکستان منرل انویسٹمنٹ فورم 2025 سے خطاب کرتے ہوئے پاک فوج کے سربراہ جنرل عاصم منیر نے بین الاقوامی اداروں کو خوش آمدید کہتے ہوئے انہیں اعتماد کے تحفظ کیلیے مضبوط سیکیورٹی فریم ورک اور فعال اقدامات کرنے کا یقین دلاتے ہوئے کہا ہے کہ پاک فوج اپنے شراکت داروں اور سرمایہ کاروں کے مفادات کیلیے اقدامات یقینی بنائے گی۔
آرمی چیف نے کہا کہ پختہ یقین ہے کہ پاکستان عالمی معدنی معیشت میں رہنما کے طور پر ابھرنے کو تیار ہے۔ بین الاقوامی ادارے اپنی مہارت سے پاکستان کو روشناس کرائیں اور وسائل کی وسیع صلاحیت کی ترقی میں شراکت داری کریں۔ پاکستان میں اپ اور ڈاؤن اسٹریم معدنی صنعتوں کی ترقی کو بھی یقینی بنایا جائیگا۔
جنرل عاصم منیر نے کہا کہ معدنیات کی دولت کو اخذ کرنے کیلیے انجینئرز، جیالوجسٹ، آپریٹرز اور ماہر کان کن درکار ہیں۔ ہمارا مقصد معدنی شعبے کیلیے افرادی قوت، مہارت اور انسانی وسائل پیدا کرنا بھی ہے۔ ہم اس شعبےکی ترقی کیلیے طلبا کو بیرون ملک تربیت کیلیے بھی بھیج رہے ہیں۔ بلوچستان کے 27 پاکستانی طلبا زیمبیا، ارجنٹینا میں منرل ایکسپلوریشن میں تربیت لے رہے ہیں۔
ان کا کہنا تھا کہ اقتصادی سلامتی، قومی سلامتی کے ایک اہم جز کے طور پر ابھری ہے۔ہم پاکستانی بیک آواز شراکت داروں اور سرمایہ کاروں کو یقین دلاتے ہیں کہ کاروبار اور معدنی دولت سے استفادے کیلیے آپ کی مہارت سے مستفید ہونا ہماری قومی خواہش ہے۔ آپ پاکستان پر پُر اعتماد پارٹنر کے طور پر بھروسہ کر سکتے ہیں۔
جنرل عاصم منیر نے کہا کہ بلوچ قبائلی عمائدین کی کاوشوں کا بھی معترف۔ انہوں نے کان کنی کے کاموں کو فروغ دینے اور بلوچستان کی ترقی و پیش رفت میں اہم کردار ادا کیا۔ پاکستان کا معدنی شعبہ اجتماعی فائدے کیلیے علاقائی ترقی اور خوشحالی کو فروغ دے سکتا ہے۔
پاکستان منرلز انویسٹمنٹ فورم کے پہلے دن درجنوں ایم او یوز اور معاہدوں پر دستخط
اس موقع پر آرمی چیف نے پاکستانیوں کو مخاطب کرتےہوئے کہا کہ پاکستانی عوام کے پیروں کے نیچے وسیع معدنی ذخائر اور ہاتھوں میں مہارت ہے۔ شفاف معدنی پالیسی کے ہوتے ہوئے مایوسی اور بے عملی کی کوئی گنجائش نہیں۔ آگے بڑھیں اور جدوجہد کریں ملک کے لیے اور اپنے لیے۔
