قومی ٹیم کے سابق کپتان شاہد آفریدی نے چیئرمین پی سی بی محسن نقوی کو ایک عہدہ چھوڑنے کا مشورہ دے دیا۔
سابق کپتان شاہد آفریدی نے کہا کہ اگر پی سی بی چیئرمین محسن نقوی وزارت داخلہ اور پی سی بی چیئرمین شپ میں سے ایک کام کا انتخاب کریں تو اس سے پاکستان کا فائدہ ہوگا۔
انہوں نے کہا کہ میرے خیال میں ایک وقت میں دو کاموں سے وہ مکمل توجہ نہیں دے پارہے ہیں۔
شاہد آفریدی نے محسن نقوی کو مشورہ دیا کہ پی سی بی 24/7 والی نوکری ہے اس لیے آپ وزارت داخلہ اور پی سی بی میں سے کسی ایک کا انتخاب کریں، آپ ایک کام کریں گے تو اس سے پاکستان کو زیادہ فائدہ ہوگا۔
انہوں نے کہا کہ محسن نقوی محنتی شخص کو جو کرکٹ کے لیے کچھ کرنا چاہتے ہیں لیکن وہ دو کشتیوں میں سوار ہوکر ایسا نہیں کرسکے وہ ایک کام پر فوکس کرکے بہتر انداز میں معاملات آگے بڑھا سکتے ہیں۔
واضح رہے کہ امریکا میں ٹی 20 ورلڈ کپ کے دوران محسن نقوی نے شاہد آفریدی کو پی سی بی میں کام کرنے کی پیشکش کی تھی جس پر آفریدی نے کہا تھا کہ میں اپنی مصروفیات کے باوجود ہر وقت پاکستان کے لیے حاضر ہوں۔
