کراچی: گٹکا ماوا کی بڑی کھیپ بلوچستان سے کراچی اسمگل کرنے کی کوشش ناکام بناتے ہوئے 2 ملزمان کو گرفتار کرلیا۔

تفصیلات کے مطابق کراچی میں موچکو پولیس نے خفیہ اطلاع پر کارروائی کرتے ہوئے مضحر صحت گٹکے ماوے کی بڑی کھیپ حب چوکی بلوچستان سے کراچی ترسیل کرنے کی کوشش ناکام بنادی۔

پولیس نے کارروائی میں 2 ملزمان کو گرفتار کرلیا، ایس ایس پی فیضان علی نے بتایا کہ حب ریور روڈ ٹپال کٹ کے پاس گٹکا ماوا سے لوڈ سوزوکی پکڑی گئی، سوزوکی سے 60 عدد بورے وزنی 1135 کلو مضحر صحت گٹکا ماوا برآمدہوا۔

فیضان علی کا کہنا تھا کہ گٹکا ماوا کی ترسیل میں ملوث طائف اللہ اور ارشاد نامی ملزمان گرفتار کرلئے گئے جبکہ ثاقب نامی ایک ملزم موقع سے فرار ہونے میں کامیاب ہو گیا۔

انھوں نے مزید کہا کہ ملزمان کے خلاف مقدمہ درج کر کے مزید تفتیش کی جا رہی ہے۔