کراچی: پاکستان پیپلز پارٹی کے سینئر رہنما تاج حیدر کراچی میں انتقال کر گئے ہیں، وہ برطانوی ہند میں 8 مارچ 1942 کو کوٹہ، راجستھان کے ایک علمی گھرانے میں پیدا ہوئے۔
تاج حیدر کے والد پروفیسر کرار حسین اس وقت میرٹھ کالج میں انگریزی ادب کے استاد تھے، 1948 میں پروفیسر کرار حسین ہجرت کر کے پاکستان آئے، مرحوم پی پی رہنما حیدر نے ابتدائی تعلیم گورنمنٹ بوائز ہائی اسکول رنچھوڑ لائنز کراچی سے حاصل کی۔
انھوں نے انٹرمیڈیٹ خیر پور کالج سندھ سے کیا، کراچی یونیورسٹی سے 1962 میں بی ایس سی آنرز کیا، اور کراچی یونیورسٹی ہی سے ریاضی کے مضمون میں ایم ایس سی کی ڈگری حاصل کی۔
تاج حیدر نے 1967 کے سوشلسٹ کنوینشن میں شرکت کی اور پیپلز پارٹی میں شمولیت اختیار کر لی، ان کا شمار اس دور کے پاکستان پیپلز پارٹی کے بانی اراکین میں ہوتا ہے، انھوں نے 1970 میں ایٹمی پراجیکٹ سے متعلق پالیسی مرتب کرنے میں اہم کردار ادا کیا۔
پاکستان پیپلز پارٹی کے سینئر رہنما تاج حیدر انتقال کر گئے
1999 سے 2000 تک انھوں نے پاکستان پیپلز پارٹی کے ابتدائی صنعتی منصوبوں میں حصہ لیا، ہیوی مکینیکل کمپلیکس کے قیام، حب ڈیم اور دیگر کئی سماجی پروگرامز کا اجرا کیا۔
تاج حیدر پیپلز پارٹی کے نمایاں لیڈر، صوبائی سیکریٹری جنرل اور دو بار سینیٹر منتخب ہوئے، پہلی بار جولائی 1995 میں سینیٹ کے رکن منتخب ہوئے، دوسری بار 2014 میں وہ ڈاکٹر عبدالحفیظ شیخ کی خالی کردہ نشست پر سینیٹر منتخب ہوئے۔ وہ سینیٹ کی مختلف قائمہ کمیٹیوں کے رکن رہے، اور 2013 میں سندھ کی صوبائی حکومت کے میڈیا کوآرڈینیٹر مقرر ہوئے۔
