اسلام آباد: الیکشن کمیشن نے سپریم کورٹ سے اوورسیز پاکستانیوں کو ووٹنگ کا حق دینے کیلیے دائر درخواستیں خارج کرنے کی استدعا کر دی۔
سپریم کورٹ میں اوورسیز پاکستانیوں کو ووٹ کا حق دینے کے کیس میں الیکشن کمیشن نے تحریری جواب جمع کروا دیا جس میں دائر درخواستیں خارج کرنے کی استدعا کی گئی۔
الیکشن کمیشن نے تحریری جواب میں کہا کہ دائر درخواستوں میں الیکشن ایکٹ میں ترمیم چیلنج کی گئی ہے، الیکشن کمیشن ای ووٹنگ کا پائلٹ پروجیکٹ اکتوبر 2018 کے ضمنی انتخاب میں کر چکا ہے جس کی رپورٹ منظوری کیلیے پارلیمنٹ کو پیش کی جا چکی ہے۔
تحریری جواب میں کہا گیا کہ سپریم کورٹ کے حکم پر پائلٹ پروجیکٹ کا تھرڈ پارٹی آڈٹ بھی کروایا گیا جس کی رپورٹ کے مطابق آئی ووٹنگ محفوظ ہے نا ووٹ کی رازداری، پارلیمان کا استحقاق ہے کہ اوورسیز پاکستانیوں کی ووٹنگ کیلیے کیا طریقہ اپناتی ہے، پارلیمان کی صوابدید ہے اوورسیز کیلیے نشستیں مختص کرے یا پوسٹل بیلٹ۔
اس میں مزید کہا گیا کہ پارلیمان چاہے تو اوورسیز پاکستانیوں کیلیے سفارتخانوں میں ووٹنگ کا قانون بنا سکتی ہے لہٰذا الیکشن ترمیمی ایکٹ کے خلاف دائر درخواستیں خارج کی جائیں۔
یاد رہے کہ بانی پاکستان تحریک انصاف (پی ٹی آئی) عمران خان، سابق وفاقی وزیر شیخ رشید و دیگر نے اووسیز پاکستانیوں کو ووٹ کا حق نہ دینے کی ترمیم چیلنج کر رکھی ہے۔
