پاکستانی اداکارہ ہانیہ عامر نے بھارتی اداکارہ اپوروا مکھیجا عرف دی ریبل کڈ کو ملنے والی ریپ کی سینکڑوں دھمکیوں پر پیغام شیئر کیا ہے۔
ہانیہ عامر نے ایک پوسٹ پر رد عمل ظاہر کیا ہے جس میں اپوروا مکھیجا عرف دی ریبل کڈ کو ملنے والی ریپ کی سینکڑوں دھمکیوں کی نشاندہی کی گئی تھی۔
ہانیہ نے فیشن کمنٹیٹر صوفی موتی والا کے انسٹاگرام اکاؤنٹ سے تازہ ترین پوسٹ شیئر کی جہاں انھوں نے اپوروا مکھیجا کو ملنے والی ریپ کی سینکڑوں دھمکیوں اور تیزاب گردی کی باتوں پر تبصرہ کیا جو اپوروا کو گزشتہ چند ہفتوں کے دوران موصول ہوئی ہیں۔
پوسٹ میں، صوفی نے لکھا کہ وہ اپوروا کے ساتھ کھڑے ہیں، انھوں نے مزید کہا کہ کوئی بھی خاتون ان قابل رحم تبصروں کی مستحق نہیں اور زیادہ سے زیادہ لوگوں کو اس طرح کے مسئلے پر اپنی تشویش کا اظہار کرنا چاہیے۔
ہانیہ عامر نے اپنے انسٹاگرام اسٹوریز پر پوسٹ شیئر کرتے ہوئے لکھا، ’’ ایسے لوگوں کے لیے جہنم میں ایک الگ جگہ ہے‘‘۔
خیال رہے کہ بھارتی اداکارہ اور سوشل میڈیا انفلوئنسر اپوروا مکھیجا نے انسٹاگرام پر کافی عرصے بعد ایک پوسٹ شیئر کی ہے جس میں انھوں نے اپنے بارے میں ہونے والے سیکڑوں دھمکی آمیز تبصروں کے بارے میں بتایا ہے۔
اپوروا مکھیجا نے اس بات کا ذکر کیا کہ فروری میں انڈیاز گاٹ لیٹنٹ تنازع کے بعد انھیں عصمت دری اور جان سے مارنے کی دھمکیاں ملی ہیں۔
انڈیاز گاٹ لیٹنٹ کا تنازع اس وقت سامنے آیا تھا جب یوٹیوبر رنویر الہبادیا نے نامناسب بات کی تھی، جس کے بعد اپوروا، رنویر الہبادیا، اور کامیڈین سمے رائنا کے خلاف کئی ایف آر درج کی گئی تھیں۔
