سعودی عرب میں آج 12 اپریل 2025 کو 24 قیراط سونے کی فی تولہ قیمت تاریخ کی نئی بلند ترین سطح پر پہنچ گئی۔
فاریکس ڈاٹ پی کے کے مطابق سعودی عرب میں 24 قیراط کا فی تولہ سونا مزید اضافے کے بعد 4 ہزار 434 ریال کا ہوگیا جبکہ 10 گرام سونا 3 ہزار 805 ریال اور فی اونس 11 ہزار 836 ریال میں فروخت کیا جا رہا ہے۔
گزشتہ روز پاکستان میں سونے کی قیمت میں ایک دن میں سب سے بڑا اضافہ ریکارڈ کیا گیا۔ آل پاکستان صرافہ ایسوسی ایشن کے مطابق فی تولہ سونے کی قیمت 10 ہزار روپے کے اضافے سے 3 لاکھ 38 ہزار 800 روہے نئی بلند ترین سطح پر پہنچ گئی۔
یہ بھی پڑھیں: گھر میں سونا رکھنے کی حد مقرر
دس گرام سونے کی قیمت 8573 روپے کے اضافے سے 2 لاکھ 90 ہزار 466 روپے کی بلند ترین سطح پر آگئی۔ عالمی صرافہ بازار میں سونے کی قیمت 100 ڈالرز کے ریکارڈ اضافے کے بعد 3218 فی اونس کی تاریخی سطح پر رہی جبکہ چاندی کی فی تولہ قیمت 3234 روپے پر مستحکم رہی۔
ماہرین کا کہنا تھا کہ عالمی سطح پر بڑھتی ہوئی تجارتی کشیدگی اور ٹیرف وار کے باعث سونے کی قیمت میں زبردست اضافہ دیکھا جا رہا ہے اور سرمایہ کار سونے کو محفوظ پناہ گاہ سمجھ کر خرید رہے ہیں۔
مارکیٹ تجزیہ کاروں کا کہنا ہے کہ موجودہ جغرافیائی اور معاشی غیر یقینی صورتحال کے پیشِ نظر سرمایہ کار اسٹاک مارکیٹ اور دیگر خطرناک اثاثوں سے نکل کر قیمتی دھاتوں کی طرف رخ کر رہے ہیں، جس نے سونے کی قیمت کو نئی بلندیوں پر پہنچا دیا ہے۔
سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔ اسے صدیوں سے کرنسی اور دولت کی شکل کے طور پر استعمال کیا جاتا رہا ہے۔
جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں، پاکستان میں گذشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
