ایران کے علاقے مہرستان میں 8 پاکستانیوں کے قتل پر دفتر خارجہ کا ردعمل آگیا۔
دفتر خارجہ کا کہنا ہے کہ افسوسناک واقعے پر ایرانی حکام سے رابطے میں ہیں تفصیلات حاصل کی جارہی ہیں، حقائق سامنے آنے پر باضابطہ بیان جاری کیا جائے گا۔
دفتر خارجہ کا کہنا ہے کہ مصدقہ معلومات کے بعد ہی مؤقف اختیار کریں گے۔
واضح رہے کہ ایران کے صوبے سیستان میں پاکستان سے تعلق رکھنے والے 8 شہریوں کو نامعلوم ملزمان نے قتل کردیا، ایرانی میڈیا نے بتایا کہ پاکستانی باشندوں کو آج صبح مہرستان ضلع کے گاؤں حزآباد پائیں میں قتل کیا گیا۔
ایرانی میڈیا نے بتایا کہ پاکستانی باشندوں کوفائرنگ کرکے قتل کیا گیا ہے جو ورکشاپ پر موجود تھے، جاں بحق ہونے والے پاکستانی مکینک تھے۔
یہ پڑھیں: ایران میں 8 پاکستانیوں کو فائرنگ کرکے قتل کردیا گیا
جاں بحق ہونے والوں مں سے 5 کی شناخت کرلی گئی ہے، ورکشاپ کے مالک دلشاد، بیٹے نعیم، جعفر، دانش اور ناصر کا تعلق پنجاب سے ہے۔
اس سے قبل پچھلے سال جنوری میں بھی 9 پاکستانی باشندوں کو ایران کے صوبہ سیستان میں نامعلوم افراد نے فائرنگ کرکے قتل کر دیا تھا، یہ پاکستانی باشندے گزشتہ کئی سال سے ایران میں کار ورکشاپ میں کام کر رہے تھے۔
