اسلام آباد : کینالز تنازع پر ن لیگ اورپیپلزپارٹی آمنے سامنے ہیں ، پی پی ذرائع کا دعویٰ ہے کینالز پر قرارداد روکنے کے لیے قومی اسمبلی اجلاس غیرمعینہ مدت کے لیے ملتوی کیا گیا۔
تفصیلات کے مطابق نہری پانی کی تقسیم کے تنازع پر اتحادی جماعتوں میں سیاسی دراڑ پڑگئی، ن لیگ اور پیپلزپارٹی آمنے سامنے آگئے اور دونوں جماعتوں کےدرمیان فاصلے بڑھنے لگے۔
کینالز تنازع سے قومی اسمبلی کی کارروائی بھی متاثر ہورہی ہے، پی پی ذرائع کا دعویٰ ہے کینالز پر قرارداد روکنے کے لیے قومی اسمبلی اجلاس غیرمعینہ مدت کے لیے ملتوی کیا گیا۔
ذرائع نے کہا کہ پی پی نے نہروں پر قرارداد پیش کرنے کی اجازت تک اسمبلی بزنس میں ساتھ نہ دینےکی دھمکی دی، وفاقی حکومت نےغزہ پر قراردادپیش کی اس لیے پی پی نےساتھ دیا۔
ذرائع کا کہنا ہے کہ اسپیکر بیرون ملک جا رہے ہیں، ان کی غیرموجودگی میں ایوان ڈپٹی اسپیکر چلائیں یہ حکومت کو قبول نہیں، حکومت کوخدشہ ہےنہروں پر پی پی کی قرارداد ایوان میں آسکتی ہے۔
دوسری جانب حکومتِ پنجاب نے پانی کی تقسیم کو جانبدارانہ اور ناانصافی پر مبنی قراردیا ، ارسا کے نام خط میں دوٹوک موقف اپنایا کہ پنجاب کو شیئر سے کم اور سندھ کو زیادہ پانی دیا جا رہا ہے، جس سے پنجاب کے کسانوں میں بےچینی ہے۔
خط میں کہنا تھا کہ سکھر بیراج پر رائس کینال کو غیر قانونی پانی دیا جاتا رہا جو چھپایا گیا، خریف کی فصل میں بھی پنجاب کے حصے کا پانی زیادہ اور سندھ کا کم روکا جا رہا ہے۔
یاد رہے بیک ڈوررابطوں میں وفاقی حکومت نےپی پی کو کینال منصوبہ ختم کرنےکی پیشکش کی تھی، ذرائع نے بتایا تھا کہ وفاقی وزیر نے پیغام دیا کینال منصوبے کو ایکنک ایجنڈے کا حصہ بنایا جائے نہ منظوری دی جائے گی۔
جس پر پی پی رہنماؤں نےجواب دیا تھا زبانی وعدے پر یقین نہیں، جب تک وزیراعظم یاوفاقی حکومت منصوبہ ختم کرنے کا اعلان نہیں کرے گی، احتجاج جاری رہے گا۔
