پشاور: مشیر خزانہ خیبر پختونخوا حکومت مزمل اسلم نے گندم کے نرخ، شرح نمو اور پیٹرولیم مصنوعات پر لیوی کی قیمتوں میں اضافے پر اپنے ردعمل کا اظہار کر دیا۔

مزمل اسلم نے کہا کہ گندم کی قیمت میں فی من 100 روپے کم ملنے سے کسانوں کا 75 ارب روپے کانقصان ہو رہا ہے جبکہ پنجاب کے کسانوں کو 50 ارب روپے کا نقصان ہو رہا ہے۔

مشیر خزانہ کے پی نے کہا کہ گندم کی موجودہ قیمت کے حساب سے 1200 روپے فی من کسانوں کو نقصان ہے، پنجاب کے کسانوں کا 600 ارب روپے باقی ملک کے کسانوں کا 300 ارب بنتا ہے، یہی کل نقصان تقریباً 3.2 ارب ڈالر کا بنتا ہے، اسی صورتحال کے تناظر میں مستقبل میں گندم کی درآمد کرنی پڑے گی، اتنی رقم پھر درآمد کی شکل میں غیر ملکی کسانوں کو ادا کریں گے۔

یہ بھی پڑھیں: ملک بھر کے گیس صارفین قیمتوں میں اضافے کیلیے تیار ہو جائیں

انہوں نے کہا کہ رواں سال شرح نمو 2.5 تا 3.0 فیصد رہے گی جو 4 فیصد ہدف سے کم ہے، زمینی حقائق کے مطابق پہلے 8 ماہ میں صنعتوں کی پیداوار منفی 1.9 فیصد ہے، صنعتی پیداوار مارچ کے مہینے میں منفی 5.9 فیصد رہی، زراعت تاریخ کی بدترین دور سے گزر رہی ہے کسی قدرتی آفت کا بھی سامنا نہیں ہے۔

ان کا کہنا تھا کہ پیٹرولیم مصنوعات پر لیوی پہلے 30 سے 70 کی اور اب مزید لیوی لگائیں گے تاکہ پیٹرول سستا نہ ہو، حکومت کی جانب سے گیس مزید مہنگی کرنے کی تیاری ہو رہی ہے جبکہ کھاد پر نئے بجٹ میں ٹیکس لگانے پر بھی کام ہو رہا ہے۔

پیٹرولیم مصنوعات پر لیوی

وفاقی حکومت نے عالمی منڈی میں تیل کے نرخ کم ہونے کے باوجود پیٹرولیم مصنوعات کی قیمتیں برقرار رکھتے ہوئے اس پر لیوی میں اضافہ کیا ہے۔

حکومت نے پیٹرول پر پیٹرولیم لیوی 8 روپے 2 پیسے بڑھا کر شرح 78 روپے 2 پیسے فی لیٹر کر دی جبکہ ڈیزل پر لیوی کی شرح 7 روپے 1 پیسے فی لیٹر اضافے کے ساتھ 77 روپے 1 پیسے مقرر کر دی۔

مٹی کے تیل پر پیٹرولیم لیوی 7 روپے 99 پیسے فی لیٹر بڑھا کر شرح 18 روپے 95 پیسے کر دی گئی۔ لائٹ ڈیزل آئل پر اس کی شرح میں 7 روپے 62 پیسے فی لیٹر کا اضافہ کر کے 15 روپے 37 پیسے مقرر کی گئی۔

گزشتہ روز وفاقی حکومت نے اگلے 15 روز کیلیے پیٹرولیم مصنوعات کی قیمتیں برقرار رکھنے کا فیصلہ کیا۔

وزارت خزانہ کی جانب سے جاری نوٹیفکیشن میں بتایا گیا کہ پیٹرول کی قیمت 254 روپے 63 پیسے فی لیٹر پر برقرار رکھی گئی جس کا اطلاق 16 اپریل 2025 سے ہوگا۔