لاہور : نادرا نے ارشد عرف چائے والا کا شناختی کارڈ اور پاسپورٹ بلاک کرنے کے حوالے سے رپورٹ عدالت میں جمع کرادی۔

تفصیلات کے مطابق لاہور ہائیکورٹ میں ارشد عرف چائے والا کا شناختی کارڈ اور پاسپورٹ بلاک ہونے کیخلاف درخواست پر سماعت ہوئی۔

نادرا نے لاہور ہائیکورٹ راولپنڈی بینچ میں رپورٹ جمع کرادی، جس میں کہا کہ ارشد خان کے والد زارمحمد کی پیدائش سرگودھا کی ہے جبکہ ارشد کی پیدائش اسلام آباد جبکہ والدہ کے نام میں تضاد ہے۔

نادرا کا کہنا تھا کہ متعلقہ اداروں کی رپورٹ کے مطابق ارشد افغانی ہے۔

عدالت نے اداروں کی ارشد خان سے متعلق رپورٹ پر شوکاز نوٹس جاری کردیا اور درخواست گزار نے مزید شواہد جمع کروانے کےلیے مہلت مانگ لی۔

بعد ازاں جسٹس جواد حسن نےدرخواست پرسماعت22اپریل تک ملتوی کردی۔

مزید پڑھیں : شہرت پانے والے ارشد چائے والا کی پاکستانی شہریت پر سوال اٹھ گئے

یاد رہے ارشد خان چائے والا نے شناختی کارڈ اور پاسپورٹ بلاک کرنے پر لاہور ہائی کورٹ راولپنڈی بنچ سے رجوع کیا تھا۔

درخواست گزار کا کہنا تھا کہ نادرا حکام کی جانب سے 1978 سے قبل کے رہائشی شواہد مانگے جارہے، ارشد خان نے 17برس کی عمر میں اسلام آباد میں چائے بیچتے شہرت حاصل کی تھی۔

ارشد کی تصویر سوشل میڈیا پر وائرل ہوئی تھی تاہم شہرت پانے والے ارشد کی پاکستانی شہریت پر سوال اٹھ گئے۔