کراچی : پاکستان شوبز کی معروف اداکارہ حوریہ منصور کو عیدالفطر پر بازار سے مہندی لگوانا مہنگا پڑگیا، کیمیکل والی مہندی نے ان کے اور ان کی دوستوں کے ہاتھوں کو جلا ڈالا۔
عید ہو یا کوئی بڑی تقریب خواتین کیلیے مہندی لگوانا لازم و ملزوم سمجھا جاتا ہے، لیکن یہ کام کرتے ہوئے انتہائی احتیاط اور حاضر دماغی کی ضرورت ہوتی ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں اداکارہ حوریہ منصور نے چاند رات کو پیش آنے والے دل دہلا دینے والے واقعہ ناظرین کو سنایا۔
انہوں نے بتایا کہ ویسے تو میری کزن بہت اچھی مہندی لگاتی ہے اکثر تقریبات میں ہم سب اسی سے مہندی لگواتی ہیں لیکن اس بار عید پر دل چاہا کہ کیوں نہ چاند رات پر بازار سے مہندی لگوائی جائے۔
انہوں نے بتایا کہ ہوا یہ کہ ہماری باری بہت دیر بعد آئی تو پہلے میری دو دوستوں نے ایک ایک ہاتھ پر لگوائی اور اس کے بعد میں نے لگوائی لیکن اس دوران دونوں کے ہاتھوں میں جلن ہونا شروع ہوگئی اور ان کو تکلیف اتنی ہورہی تھی کہ انہوں نے رونا شروع کردیا۔
حوریہ منصور نے بتایا کہ ان دونوں کی نسبت مجھے بہت کم جلن ہوئی لیکن بعد میں ہم نے وہ مہندی فوراً صاف کروادی، ان کا کہنا تھا کہ اس میں زیادہ غلطی ہماری تھی کیونکہ ہمیں لگوانے سے پہلے پوچھنا چاہیے تھا۔
