مسلم لیگ ن کے قائد نواز شریف اور وزیراعظم شہباز شریف نے پانی کے مسئلے پر پیپلزپارٹی سے بات چیت کی ہدایت کردی۔
وزیراعظم کے مشیر برائے سیاسی امور رانا ثنا اللہ نے کہا کہ پیپلزپارٹی کی قیادت کا بہت احترام ہے، پیپلزپارٹی وفاق کا حصہ ہے پانی پر سیاست نہیں کرنی چاہیے۔
انہوں نے کہا کہ وزیراعظم اور نواز شریف نے بات چیت سے مسئلے کے حل کا کہا ہے۔
رانا ثنا اللہ نے کہا کہ آئینی عہدوں پر ہوں تو بات زیادہ ذمہ داری سے کرنی چاہیے، معاملات میز پر بیٹھ کر حل کرنے چاہئیں۔
ان کا کہنا تھا کہ 1991 میں صوبوں کے درمیان طے پانے والے معاہدے اور 1992 کے ارسا ایکٹ کی موجودگی میں کسی سے ناانصافی نہیں ہو سکتی، کسی صوبے کا پانی دوسرے صوبے کے حصے میں نہیں جا سکتا، اس امر کو یقینی بنانے کے لیے ملک میں آئینی طریقہ کار اور قوانین موجود ہیں۔
دوسری جانب وزیر اطلاعات سندھ شرجیل میمن کا کہنا ہے کہ وزیراعظم کینالز منصوبہ ختم کرنے کا اعلان کریں۔
ان کا کہنا تھا کہ پیپلزپارٹی بات چیت کو تیار ہے،بلاول بھٹو نے حیدرآباد جلسے میں کہا ہے پانی کی تقسیم کی پچاس سال کی پالیسی پربیٹھ کربات چیت کو تیار ہیں، نہروں کے معاملے پر پورا سندھ سراپا احتجاج ہے۔۔
