دریائے سندھ سے متنازع نہریں نکالنے کے خلاف قوم پرست جماعت کی جانب سے آج سندھ میں شٹر ڈاؤن ہڑتال ہے، کارکنوں نے ریلوے ٹریک بھی بند کردیا۔
تفصیلات کے مطابق دریائے سندھ سے نئی نہریں نکالنے کے خلاف سندھ بھر میں احتجاج جاری ہے، جام شورو، لاڑکانہ، نوشہر و فیروز، سجاول، نواب شاہ اور گھوٹکی سمیت کئی شہروں میں شٹر ڈاون ہڑتال ہے۔
دوسری جانب خیر پور میں ببرلو بائی پاس پر وکلا کا دھرنا تیسرے روز بھی جاری ہے، اس کے علاوہ سندھ اور پنجاب کے درمیان ٹریفک معطل ہے۔
نئی نہریں نکالنے کے خلاف لاڑکانہ میں دکانیں بازار اور پیٹرول پمپ بند ہیں، رتو ڈیرو، باقرانی، ڈوکری اور باڈہ سمیت ضلع بھر میں کاروباری سرگرمیاں معطل ہیں۔
کینالز معاملے پر وفاق اور سندھ میں بات چیت سے مسئلہ حل کرنے پر اتفاق
قوم پرست جماعت کے کارکنان نے ہالانی اور کنڈیارو کے مقام پر قومی شاہراہ بند کردی جس سے ٹریفک کی روانی معطل ہوگئی۔
ریلوے ٹریک بلاک
دوسری جانب ریلوے ذرائع کا کہنا ہے کہ کینالز کیخلاف دھرنا دیتے ہوئے شرکا نے خیرپور اور روہڑی جنکشن پر ریلوے ٹریک بلاک کردیا ہے۔
ریلوے ذرائع کے مطابق پشاور سے کراچی آنیوالی عوام ایکسپریس کو خیر پور کے پاس روک دیا گیا، رحمان بابا ایکسپریس کو بھی روہڑی جنکشن پر روک دیا گیا۔
ہڑتال کے دوران فائرنگ
اس کے علاوہ لاڑکانہ میں نئے کینالز منصوبے کے خلاف ہڑتال کے دوران فائرنگ کے نتیجے میں لڑکا زخمی ہوگیا یہ فائرنگ کا واقعہ رحمت پور تھانے کی حدود میں پیش آیا۔
پولیس کا اس حوالے سے کہنا ہے کہ چند دکانوں کے کھلے ہونے پر مظاہرین علاقے میں پہنچے تھے، مظاہرین کے پہنچنے پر فائرنگ ہوئی جبکہ زخمی ہونے والا لڑکا احتجاج میں شامل تھا اور وہ اپنے ساتھیوں کی گولی کی زد میں آیا۔
مویشیوں سے لدی گاڑیاں بھی پھنس گئیں
سندھ میں مختلف ہائی ویز پر دھرنے کی وجہ سے مویشیوں سے لدی گاڑیاں بھی پھنس گئیں، شدید گرمی میں 24 گھنٹے سے گاڑیوں میں پھنسے جانور پانی اور چارہ سے محروم ہیں۔
ذرائع کا اس حوالے سے کہنا ہے کہ قربانی کیلئے کراچی لائے جانے والے جانوروں کی راستے میں ہلاکت کا خدشہ ہے جبکہ راستے بند ہونے سے رانی پور اور سکھرکے درمیان سیکڑوں مال بردار گاڑیاں بھی پھنسی ہوئی ہیں۔
