کراچی : گورنر سندھ کامران ٹیسوری نے نجف میں حضرت علی کرم اللّٰہ وجہہ کے روضہ پر حاضری دی اور اہم مقامات کی زیارت کرکے ملک کی سلامتی و استحکام کے لیے خصوصی دعائیں کیں۔
تفصیلات کے مطابق گورنر سندھ کامران ٹیسوری بوہرہ کمیونٹی کے روحانی پیشواء سیدنا مفضل سیف الدین کی خصوصی دعوت پر پانچ روزہ دورے پر عراق پہنچے۔
نجف ائیرپورٹ پر پاکستانی سفیر نے گورنر ٹیسوری کا استقبال کیا، نجف میں گورنر سندھ نے حضرت علی کرم اللّٰہ وجہہ کے روضہ پر حاضری دی ساتھ ان کے تاریخی گھر اور مسجد کوفہ کی زیارت کی۔
حضرت مسلم بن عقیلؓ کے روضہ اقدس پر بھی فاتحہ خوانی کی اور مہمانوں کی یادگارکتاب میں اپنےقلبی تاثرات قلمبند کیے۔
کامران ٹیسوری نے نجف میں اہم مقامات کی زیارت اور نوافل کی ادائیگی کے بعد ملک و قوم کی سلامتی ، استحکام اور معاشی خوشحالی کے لیے خصوصی دعا بھی مانگی ۔
عراق کے دورے پر گورنر سندھ اور گورنر نجف کے درمیان اہم ملاقات ہوئی، جس میں مذہبی ، سیاحتی ، تجارتی تعلقات کو فروغ دینے ، جلد تجارتی وفود کے تبادلے سمیت ایس آئی ایف سی کے ذریعے آئی ٹی ، توانائی اور ذراعت میں سرمایہ کاری کرنے پر تبادلہ خیال کیا گیا۔
کامران ٹیسوری نے کہا ایس آئی ایف سی منصوبہ غیرملکی سرمایہ کاروں کی مؤثر رہنمائی کرتا ہے۔ سندھ میں سرمایہ کاری کےوسیع مواقع ہیں۔
