اسلام آباد: جسٹس منصور علی شاہ نے قائم مقام چیف جسٹس پاکستان کے عہدے کا حلف اٹھالیا۔
تفصیلات کے مطابق جسٹس منصور علی شاہ کی بطور قائم مقام چیف جسٹس کی حلف برداری کی تقریب سپریم کورٹ میں ہوئی،حلف برداری تقریب میں سپریم کورٹ کے ججز نے شرکت کی۔
تقریب میں جسٹس منصور علی شاہ نے قائم مقام چیف جسٹس پاکستان کے عہدے کا حلف اٹھایا، سپریم کورٹ کےسینئر جج جسٹس منیب اختر نے جسٹس منصور علی شاہ سے حلف لیا۔
اٹارنی جنرل، لاء افسران اور وکلا بھی تقریب بھی شریک ہوئے۔
خیال رہے چیف جسٹس جسٹس یحییٰ آفریدی 22 تا 26 اپریل کے دوران چین کے شہر ہانگژو میں منعقد ہونے والی ایس سی او کے رکن ممالک کی سپریم کورٹس کے چیف جسٹسز کی 20ویں کانفرنس میں شرکت کریں گے۔
دورے کے دوران سپریم کورٹ پاکستان اور سپریم پیپلز کورٹ چین کے درمیان تاریخی ایم او یو پر دستخط ہوں گے ، ایم او یو سے عدالتی روابط، تربیت، معلومات کے تبادلے میں پیشرفت ہوگی۔
اعلی عدلیہ کے ترجمان کا کہنا تھا کہ ایم او یو میں بین الاقوامی کمرشل لا، ثالثی، سائبر کرائم، مالیاتی جرائم شامل ہوں گے، موسمیاتی تبدیلی، عدالتی ٹیکنالوجی اور تنازعات کے حل میں تعاون شامل ہوگا جبکہ عدالتی فیصلوں کے نفاذ اور شہری مقدمات میں باہمی قانونی معاونت کا نظام بہتر ہوگا، دونوں ممالک عدالتی خودمختاری اور قانون کی حکمرانی کے اصولوں پر کاربند ہیں۔
