کراچی : گلشن حدید میں دوران ڈکیتی کار شو روم کے مالک کے قتل کے واقعے کی سی سی ٹی وی فوٹیج سامنے آگئی۔
تفصیلات کے مطابق کراچی کے علاقے گلشن حدید میں رقم چھینے کی واردات کے دوران کار شوروم کے مالک 28 سالہ عالم خان کے قتل کے واقعے کی سی سی ٹی وی فوٹیج سامنے آگئی۔
پولیس نے بتایا کہ مقتول عالم خان بینک سے 8لاکھ 90 ہزار روپے لیکر نکلا تھا، پولیس نے نجی بینک میں نصب سی سی ٹی وی کیمروں کی فوٹیج حاصل کی۔
سی سی ٹی وی فوٹیج میں دیکھا جاسکتا ہے ایک مشکوک شخص بینک میں مختصر وقت کے لیے داخل ہوا اور بینک سے باہر نکل جاتا ہے۔
پولیس کو مشکوک شخص پر مقتول عالم خان کے پاس رقم کی موجودگی کی اطلاع اپنے ساتھی کو دینے کا شبہ ہے، مشکوک شخص نجی بینک کے باہر نکلنے کے بعد ایک گاڑی میں بیٹھ جاتا ہے، گاڑی میں اس کے دیگر ساتھی بھی موجود ہیں۔
فوٹیج میں دیکھا گیا کہ مشکوک افراد گاڑی میں اپنی پوزیشن بھی تبدیل کرتے ہیں، ڈرائیونگ سیٹ پر بیٹھا مشکوک شخص گاڑی سے اتر دوسری جانب گاڑی میں بیٹھ جاتا ہے اور دوسری جانب گاڑی میں بیٹھا مشکوک شخص گاڑی کی ڈرائیونگ سینٹ پر بیٹھ جاتا ہے۔
پولیس کا کہنا ہے کہ شک ہے کہ ملزمان کے کچھ سامنے موٹر سائیکل پر بھی تھے، گاڑی میں سوار مشکوک ملزمان گاڑی سے اتر کر موٹر سائیکل پر سوار ہوئے اور واردات انجام دی۔
ایک اورسی سی ٹی وی فوٹیج میں دیکھا جاسکتا ہے کہ ملزمان نے اسلحہ کے زور پر گاڑی کو روکا، دو ملزمان نے دونوں افراد کو گاڑی سے اتار کرتلاشی لی، ملزمان نے واردات کے بعد جاتے ہوئے فائرنگ کی، جس کے باعث زخمی عالم خان دوران علاج اسپتال میں دم توڑ گیا۔
پولیس کا کہنا ہے کہ مزید سی سی ٹی وی فوٹیجز حاصل کرنے کی کوشش کی جارہی ہیں۔
