راولپنڈی: بانی پاکستان تحریک انصاف (پی ٹی آئی) کی دو بہنوں عظمیٰ اور نورین خان اڈیالہ جیل کے اندر روانہ ہوگئیں جبکہ علیمہ خانم کو بھائی سے ملاقات کی اجازت نہ مل سکی۔
آج بروز منگل عمران خان سے فیملی اور وکلا ٹیم کی ملاقات کا دن ہے جس کیلیے ان کی بہنیں اور وکلا ٹیم اڈیالہ جیل پہنچے لیکن انہیں گورکھپور ناکے پر پولیس نے روک لیا۔
عمران خان کی ہمشیرہ علیمہ خانم نے میڈیا سے گفتگو میں کہا کہ پولیس سے پہلے پوچھنا چاہیے یہ ہمیں روک کیوں رہے ہیں؟ ہمیں سمجھ نہیں آ رہی کہ ان کو خواتین سے کیا خوف ہے، ہم کیا اپنے بھائی سے ملنے کیلیے نہ آئیں؟
یہ بھی پڑھیں: بانی پی ٹی آئی سے ملاقات نہ کرانے پر توہین عدالت کی درخواست دائر
علیمہ خانم نے کہا کہ ہم نے واپس نہیں جانا ہم ادھر ہی بیٹھے رہیں گے، اب ایک ماہ ہوگیا ہم اپنے بھائی عمران خان سے نہیں ملے، سلمان اکرم راجہ، سلمان صفدر اور ظہیر عباس ہمارے کیسز دیکھ رہے ہیں، جب وکلا کو بھی نہیں ملنے دیں گے تو کیسز کس سے ڈسکس کریں گے؟
انہوں نے کہا کہ ہم چاہتے ہیں ہمارے وکلا کی جگہ دوسرے لوگوں کو نہ بھیجیں، ہم اس بات سے اتفاق نہیں کرتے جس کو اجازت ملے وہ جائے، میں ان سے کہتی ہوں میری دو بہنوں کو اجازت دے دیں، عمران خان نے کوئی پیغام دینا ہوگا تو وہ ان کے ذریعے بھی آئے گا۔
بعدازاں عمران خان کی دو بہنوں عظمیٰ اور نورین کو بھائی سے ملاقات کی اجازت ملی جس کے بعد وہ اڈیالہ جیل کے اندر روانہ ہوگئیں۔
اس پر علیمہ خانم نے کہا کہ کوئی بات نہیں اگر مجھے اجازت نہیں ملی دو کو تو مل گئی۔
ملاقات کی اجازت نہ ملنے پر عمران خان کے وکیل فیصل ملک نے میڈیا سے گفتگو میں کہا کہ سلمان اکرم راجہ کی فہرست کے صرف 2 لوگ نعیم پنجوتھا اور میں مختلف راستوں سے اڈیالہ جیل پہنچے لیکن اندر نہیں جانے دیا جا رہا۔
وکیل فیصل ملک نے بتایا کہ سلمان اکرم راجہ کو بھی ناکے پر روکا ہوا ہے، ہم عمران خان سے کیسز سے متعلق مشاورت کیلیے آئے ہیں، ہمیں زبردستی اندر جانے سے روک دیا گیا ہے۔
