بھارتی شہر اندور میں شادی کی تقریب کے دوران بجلی غائب ہونے پر دولہے میاں کو غصہ آگیا اور اس نے سب کے سامنے دلہن کی پٹائی کر دی۔
انڈین میڈیا کی رپورٹس کے مطابق بنگنگا میں شادی کی تقریب کے دوران دلہن والے بارات کا انتظار کر رہے تھے۔ جیسے ہی دولہے میاں ہیمنت کیتھواس نے انٹری دی تو انہوں نے استقبال کیا لیکن اس دوران اچانک بجلی چلی گئی۔
دلہن والوں نے بجلی بحال کرنے کیلیے متبادل انتظامات کرنا شروع کیے تاہم دولہے میاں اور باراتیوں کا پارہ ہائی ہونے لگا۔ انہوں نے تقریب میں تلخ کلامی شروع کر دی۔
یہ بھی پڑھیں: 22 سالہ نوجوان سے دھوکا، دلہن کی بیوہ ماں سے نکاح کرا دیا
جھگڑا اس قدر شدید ہوگیا کہ باراتیوں نے دلہن والوں کو مارنا شروع کر دیا اور ہر چیز توڑ پھوڑ دی۔ پولیس کو معاملے کا علم ہوا تو نفری موقع پر پہنچ گئی لیکن باراتی وہاں سے واپس لوٹ گئی تھی۔
دلہن نے پولیس کو بتایا کہ اس کی شادی ہیمنت کیتھواس سے طے تھی، بارات رات 10 بجے گھر پہنچی تو اہل خانہ نے تمام مہمانوں کا استقبال کیا اور انہیں کھانا بھی کھلایا۔
’ایک موقع پر اچانک بجلی چلی گئی تو گھر والے اسے بحال کرنے کی کوشش میں لگ گئے لیکن دولہے والوں نے ہنگامہ کھڑا کر دیا، انہوں نے پہلے تلخ کلامی کی اور پھر تشدد کا نشانہ بنایا۔‘
دلہن کے مطابق دولہا اور اس کے گھر والوں نے مجھے، میرے اہل خانہ اور بیچ بچاؤ کیلیے مداخلت کرنے والوں پر تشدد کیا اور شادی منسوخ کر کے واپس روانہ ہوگئے۔
پولیس حکام کے مطابق دلہن کی شکایت پر ملزمان کے خلاف مقدمہ درج کر لیا جس میں دولہا ہیمنت کیتھواس بھی نامزد ہے، معاملے کی تحقیقات اور ملزمان کو گرفتار کرنے کی کوشش کر رہے ہیں۔
