خیبر پختونخوا کے ضلع بنوں میں تھانہ کینٹ کی حدود شین کنڈی میں دھماکا ہوا جس کے نتیجے میں دو پولیس اہلکار زخمی ہوگئے۔
پولیس حکام نے بتایا کہ دہشتگردوں نے بارودی مواد بی ایچ یو کے ساتھ نصب کیا تھا، جمشید اور صفت نامی زخمی اہلکاروں کو اسپتال منتقل کر دیا گیا۔
گزشتہ روز خیبر پختونخوا کے ضلع لکی مروت کے علاقے درہ پیزو میں ٹریفک پولیس موبائل کے قریب دھماکا ہوا تھا۔
یہ بھی پڑھیں: بنوں میں پولیس پوسٹ پر دہشت گردوں کا بڑا حملہ ناکام بنا دیا گیا
پولیس حکام نے بتایا تھا کہ دھماکے میں پولیس موبائل انچارج عمران سمیت 3 اہلکار زخمی ہوگئے جبکہ گاڑی میں آگ لگ گئی، زخمیوں کو مقامی اسپتال منتقل کر دیا گیا۔
دھماکے سے متعلق مزید تفصیلات سامنے نہیں آ سکی تھیں۔
اس سے چند روز قبل لکی مروت میں تھانہ صدر کی حدود میں دہشتگردوں نے پولیس اہلکار رفیع اللہ کے گھر پر بم سے حملہ کیا تھا جس کے نتیجے میں گھر کا حصہ زمین بوس ہوگیا تھا۔
پولیس کا اس حوالے سے کہنا تھا کہ دہشتگردوں نے پولیس اہلکار کے گھر کے دو کمروں کو آئی ڈی بم سے اڑا دیا، دھماکے سے 2 کمرے زمین بوس جبکہ دیگر سامان کو بھی نقصان پہنچا ہے۔
پولیس کا کہنا تھا کہ پولیس نے علاقے میں سرچ آپریشن شروع کر دیا جلد ہی حملہ آوروں کو گرفتار کر لیا جائے گا۔
اس سے ایک روز قبل لکی مروت میں تھانہ غزنی خیل کی حدود میں دہشتگردوں کی فائرنگ سے فرنٹیئر کانسٹیبلری (ایف سی) کا ایک اہلکار ہلاک ہوگیا تھا۔
خیبرپختونخوا کے بعض علاقوں میں حالیہ عرصے کے دوران سکیورٹی فورسز کو دہشتگرد حملوں کا سامنا رہا ہے جس کے پیشِ نظر متعلقہ اضلاع میں حفاظتی اقدامات مزید سخت کیے جا رہے ہیں۔
