اسلام آباد : پرائم منسٹر یوتھ لیپ ٹاپ اسکیم کے حوالے سے طلبا کے لیے اہم خبر آگئی ، کون کون سے طلبا درخواست جمع کرا سکتے ہیں۔
تفصیلات کے مطابق وفاقی حکومت نے 2025 کے لیے پرائم منسٹر یوتھ لیپ ٹاپ اسکیم کو دوبارہ شروع کردیا ، جس کا مقصد پورے پاکستان میں اعلیٰ کارکردگی کے حامل طلباء کو 100,000 لیپ ٹاپ تقسیم کرنا ہے۔
یہ وسیع تر ڈیجیٹل یوتھ ہب پروگرام کا ایک اہم حصہ ہے، جس کا مقصد ملک کے نوجوانوں میں ڈیجیٹل رسائی اور مہارت کی ترقی کو تقویت دینا ہے۔
پرائم منسٹر یوتھ لیپ ٹاپ اسکیم کے لئے درخواستیں 20 مئی 2025 تک جمع کرائی جائیں۔
اہلیت کا معیار
پاکستان کی پبلک سیکٹر یونیورسٹیوں میں اس وقت داخلہ لینے والے طلباء درخواست دے سکتے ہیں، انتخاب میرٹ کی بنیاد پر ہوتا ہے اور ڈیجیٹل وسائل تک منصفانہ رسائی کو یقینی بنانے کے لیے اعلیٰ حاصل کرنے والے اور مالی طور پر مستحق طلباء کو ترجیح دی جاتی ہے۔
درخواست کیسے دے سکتے ہیں؟
طلباء سرکاری ڈیجیٹل یوتھ ہب پلیٹ فارم کے ذریعے درخواست دے سکتے ہیں
ویب سائٹ: www.pmyp.gov.pk
موبائل ایپ: Android اور iOS کے لیے دستیاب ہے۔
اینڈرائیڈ صارف: tinyurl.com/3y9czkpj
آئی فون صارف: tinyurl.com/4hkykyx6
گزشتہ سال اگست میں وزیر اعظم شہباز شریف نے ملک بھر میں بہترین کارکردگی کا مظاہرہ کرنے والے طلباء کو 10 لاکھ اسمارٹ فونز، ٹیبلیٹس اور لیپ ٹاپ دینے کا اعلان کیا تھا۔
پرائم منسٹر یوتھ پروگرام کے زیر اہتمام نوجوانوں کے عالمی دن کے موقع پر ایک تقریب سے خطاب کرتے ہوئے انھوں نے کہا تھا کہ وفاقی حکومت ملک بھر کے 10 لاکھ طلباء بشمول آزاد جموں و کشمیر، گلگت بلتستان اور بلوچستان کے دور دراز علاقوں کے طلباء کو اسمارٹ فونز، ٹیبلیٹس اور لیپ ٹاپ سے نوازے گی۔
وزیراعظم نے اعلان کیا تھا کہ وہ ذاتی طور پر چین میں 1000 زرعی گریجویٹس کی تعلیم کے لیے فنڈ دیں گے، جس کا مقصد انہیں زرعی پیداوار کو بڑھانے کے لیے جدید ٹیکنالوجی سے آراستہ کرنا ہے۔
