راولپنڈی: سابق وزیر داخلہ شیخ رشید کا کہنا ہے کہ پاکستان کی سلامتی ہمیں جان سے زیادہ عزیز ہے۔
سابق وزیر داخلہ شیخ رشید کا انسداد دہشت گردی عدالت کے باہر میڈیا سے گفتگو کرتے ہوئے کہنا تھا کہ سندھ طاس معاہدہ ختم کرنا انڈیا کا گھمنڈ ہے۔
اُنہوں نے کہا کہ پاکستان کی سلامتی کے معاملے پر قوم سیسہ پلائی دیوار ہے، یہ قوم پاکستان کے لیے جان دینے کے لیے بھی تیار ہے۔
گزشتہ روز سابق وفاقی وزیر نے کہا تھا کہ پانی روکنا جنگ کے مترادف ہے، بھارت یکطرفہ معاہدہ معطل نہیں کرسکتا۔
اُنہوں نے سماجی ویب سائٹ ایکس پر بھارتی اقدامات پر ردعمل دیتے ہوئے کہا تھا کہ سندھ طاس معاہدے کو معطل کرنا بھارت کی آبی دہشتگردی ہے، پہلگام واقعے کا پاکستان پر بے بنیاد الزام ہے۔
سابق وزیر کا کہنا تھا کہ پانی روکنا جنگ کے مترادف ہے، بھارت یکطرفہ معاہدہ معطل نہیں کر سکتا، بھارت میں کشمیریوں کیساتھ ہونیوالے ظلم و ستم کونظر انداز نہیں کیا جا سکتا۔
پاکستان کی چپہ چپہ زمین کی حفاظت کرنا قوم خوب جانتی ہے، وقت آنے پر بھارت کو ترکی بہ ترکی جواب دیں گے۔
یاد رہے پہلگام میں فالس فلیگ آپریشن کے بعد بھارت نے پاکستان کے ساتھ سندھ طاس معاہدہ معطل کرتے ہوئے اٹاری واہگہ بارڈر بند کرنے کا اعلان کیا تھا۔
نائب وزیر اعظم نے سعودی و ایرانی وزرائے خارجہ کو قومی سلامتی کمیٹی کے فیصلوں سے آگاہ کیا
بھارتی وزارت خارجہ نے پریس کانفرنس کرتے ہوئے تمام پاکستانی شہریوں کو 48 گھنٹے میں بھارت چھوڑنے کا حکم دیتے ہوئے کہا تھا کہ سارک ویزا استثنیٰ کے تحت پاکستانی شہری بھارت کا سفرنہیں کرسکیں گے۔
