پی ایس ایل 10 میں کراچی کنگز کے کیوی کھلاڑی کین ولیمسن کو کراچی کی ’بریانی‘ اور ’پراٹھا‘ پسند آگیا۔

پروگرام ’باخبر سویرا‘ میں خصوصی  گفتگو کرتے ہوئے کراچی کنگز کے کھلاڑی کین ولیمسن نے کہا کہ پاکستان دوبارہ آنے پر پرجوش ہیں، یہاں کرکٹ کے شائقین کی بڑی تعداد ہے۔

انہوں نے کہا کہ پاکستان میں لوکل مقابلے اور فرنچائز کرکٹ بہت مقبول ہیں۔

کین ولیمسن نے کہا کہ میں پہلی بار پی ایس ایل کھیل رہا ہوں جس کا تجربہ شاندار ہوگا، پی ایس ایل میں اچھی پرفارمنس دکھانے کی کوشش کروں گا۔

کیوی کھلاڑی نے کہا کہ ٹیم جب پاکستان آئی تھی تو ٹیسٹ میچز اور وائٹ بال سیریز شاندار رہی تھی۔

ایک سوال کے جواب میں کین ولیمسن نے کہا کہ پی ایس ایل کی ٹیمیں اچھی ہیں، وارنر کراچی کنگز کے کپتان ہیں ان کے ساتھ کھیلنے کا تجربہ اچھا ہوگا۔

انہوں نے کہا کہ مجھے کراچی کی ’بریانی‘ اور ’پراٹھا‘ بہت پسند ہیں۔