یوحنا آباد: سانحہ یوحنا آباد میں جان کی بازی ہارنے والے افراد کی آخری رسومات آج ادا کی جائیں گی۔
حکومتی ذرائع کے مطابق مذہبی رسومات کی ادائیگی کے موقع پر یوحنا آباد کو مکمل طور پر سیل کردیا گیا ہے تاکہ اس موقع پر کسی قسم کا کوئی ناخوشگوار واقعہ پیش نہ آسکے۔
سانحہ میں جان کی بازی ہارنے والے افراد کی مذہبی رسومات صبح گیارہ بجے ادا کی جائیں گی، سیکیورٹی انتظامات کو یقینی بنانے کے لیے فیروزپور روڈ یوحنا آباد اور اسکے اطراف میں رینجرز اور پولیس کی بھاری نفری تعینات کی جائے گی۔
پنجاب حکومت نے دھماکوں کی تحقیقات کیلئے 5 رکنی جے آئی ٹی تشکیل دے دی ہے، جو اپنی ابتدائی رپورٹ 48گھنٹوں میں پنجاب حکومت کو پیش کرے گی۔
یوحنا آباد میں دو چرچوں میں خودکش دھماکوں کے مزید دو زخمی گزشتہ روز ہلاک ہو گئے اور ہلاکتوں کی تعداد 17ہو گئی ہے۔ گزشتہ روز جنرل ہسپتال میں زخموں کی تاب نہ لاتے ہوئے ہلاک ہونے والوں میں خوشی مسیح اور برکت مسیح شامل ہیں۔
گزشتہ روز بھی لاہور کے یوحنا آباد میں 2 گرجا گھروں پرخودکش حملوں کیخلاف بھی احتجاجی مظاہروں کا سلسلہ جاری رہا اور کئی شہروں میں مسیحی برادری نے مظاہرے کئے اور جلوس نکالے اور کئی مقامات پر ٹائرجلاکر سڑکیں بلاک کردیں
