چین کے شہر کیانگژی کے قریب دریائے وو میں گزشتہ روز 2 کشتیاں بارش اور تیز ہواؤں کے باعث حادثے کا شکار ہوگئیں، جس کے باعث 3 افراد ہلاک، 20 لاپتہ ہوگئے۔
بین الاقوامی خبر رساں ادارے کی رپورٹ کے مطابق چین کے جنوب مغربی صوبے گوئژو میں اتوار کو یہ واقعہ اس وقت پیش آیا جب 2 کشتیوں میں لگ بھگ 70 افراد اپنی منزل کی جانب گامزن تھے۔
مذکورہ افراد چین کے سب سے لمبے دریا یانگژی کے معاون دریائے وو میں سفر کر رہے تھے کہ اچانک بارش، ژالہ باری اور تیز ہواؤں کے باعث کشتیاں سنبھل نہ سکیں اور اُلٹ گئیں۔
چینی میڈیا کا اس حوالے سے کہنا ہے کہ حادثے کے بعد امدادی اداروں نے 50 افراد کو ریسکیو کر لیا جبکہ 20 افراد اب تک لاپتہ ہیں اور ان کی تلاش کا عمل جا ری ہے۔
واضح رہے کہ افریقی ملک کانگو میں کشتی میں آگ لگنے کے افسوسناک واقعے میں مرنے والوں کی تعداد 148 ہو گئی ہے۔
کانگو کے حکام کا اس حوالے سے کہنا ہے کہ کشتی غرق ہونے سے سیکڑوں افراد اب بھی لاپتہ ہیں۔
میڈیا رپورٹس کے مطابق لکڑی سے بنی کشتی اُس وقت حادثے کا شکار ہوئی جب مبندکا قصبے کے قریب تقریباً 500 مسافروں کو لے جانے والی کشتی میں اچانک آگ لگ گئی تھی۔
میڈیا رپورٹس کے مطابق کشتی میں آگ اس وقت لگی جب ایک خاتون کھانا پکا رہی تھی، آگ نے دیکھتے ہی دیکھتے پوری کشتی کو اپنی لپیٹ میں لے لیا۔
تارکین وطن کی کشتیاں ڈوبنے سے 16 افراد ہلاک
حادثے کے بعد فوری کارروائی کرتے ہوئے درجنوں افراد کو بچا لیا گیا تھا تاہم کئی افراد کے جسم کافی حد تک جھلس گئے تھے۔
لاپتہ افراد کی تلاش کا سلسلہ تاحال جاری ہے، جس میں ریسکیو ٹیموں کو ریڈ کراس اور صوبائی حکام کی پوری مدد حاصل ہے۔
