اسلام آباد : وزیراعظم شہباز شریف کی زیرصدارت سیکیورٹی کے اجلاس میں فیصلہ کیا گیا کہ ڈرون حملوں میں شہید ہونے والوں کا بدلہ لیا جائے گا، ایک ایک پاکستانی کے خون کا حساب لیا جائے گا۔
تفصیلات کے مطابق وزیراعظم شہباز شریف کی زیرصدارت سیکیورٹی سے متعلق اجلاس ہوا، اجلاس میں بھارتی جارحیت کا تفصیلی جائزہ لیا گیا ، سیکیورٹی حکام کی اجلاس کے شرکاء کو بریفنگ دی گئی، جس میں بتایا گیا بھارت کے 25 اسرائیلی ڈرون مار گرائے گئے۔
اجلاس میں بھارت کے اوچھے ہتھکنڈوں کیخلاف بھرپور جوابی کارروائیاں جاری رکھنے کا فیصلہ کیا گیا۔
شرکا کو ڈرون حملوں اور پاکستانی ردعمل سے بھی آگاہ کیا گیا اور پاکستانی قیادت نے بھارتی حملوں کا منہ توڑ جواب دینے کے عزم کا اظہار کیا۔
پاک بھارت کشیدگی سے متعلق تمام خبریں
فورم نے عزم کا اظہار کیا ڈرون حملوں میں شہیدہونےوالوں کا بدلہ لیا جائے گا، ایک ایک پاکستانی کے خون کا حساب لیا جائے گا۔
اس موقع پر وزیراعظم نے کہا کہ پوری قوم پاک فوج کے ساتھ شانہ بشانہ کھڑی ہے، ہمیں اپنی پاک فوج پر فخر ہے ہم ہر حالات کے لیے تیار ہیں، پاکستان نے بھارت کے ڈرونز اور جہاز مار گرائے ہیں۔
پاکستان اپنے وقار اور عزت سےامن کیلئےپر عزم ہے، پاک افواج دشمن کے تمام عزائم ناکام بنانےکی صلاحیت رکھتی ہے، دشمن کو خود ارادیت،علاقائی سالمیت پر حملے ،سلامتی کی خلاف ورزی کا جواب ملےگا۔
