اسلام آباد: وفاقی وزیر داخلہ محسن نقوی اور قائم مقام امریکی سفیر نیٹلی بیکر میں 48 گھنٹوں میں دوسری اہم ملاقات ہوئی ہے۔
محسن نقوی اور نیٹلی بیکر کے درمیان ملاقات میں پاک بھارت کشیدگی اور سرحدوں کی صورتحال پر تبادلہ خیال کیا گیا، وزیر داخلہ نے قائم مقام امریکی سفیر کو کشیدگی اور اس سے پیدا ہونے والی صورتحال سے آگاہ کیا جبکہ بھارت کے ڈورنز دہشتگردی پر بریفنگ دی۔
پاک بھارت کشیدگی سے متعلق تمام خبریں
ملاقات کے دوران محسن نقوی نے کہا کہ بھارت نے عالمی قوانین پامال کر کے شہری آبادیوں کو ڈورنز سے نشانہ بنانے کی کوشش کی، پاکستان نے مؤثر کارروائی کر کے درجنوں ڈرونز کو مار گرایا۔
انہوں نے کہا کہ پورا خطہ جنگ کے دہانے پر ہے صورتحال کا تمام ذمہ دار بھارت ہے، سلامتی پر ہر گز آنچ نہیں آنے دیں گے۔
ملاقات میں امریکا کے پولیٹیکل قونصلر زیک ہارکن رائیڈر کی بھی شریک رہے۔
دوسری جانب نائب امریکی صدر جے ڈی وینس نے امریکی ٹی وی کو انٹرویو دیتے ہوئے کہا کہ امریکا پاک بھارت تنازع میں مداخلت نہیں کرے گا۔
جے ڈی وینس نے کہا کہ امریکا ایسی جنگ میں مداخلت نہیں کرے گا جس سے اس کا کوئی سروکار نہیں، بھارت نے حملہ کیا اور پاکستان نے جواب دیا، دونوں ممالک کو ٹھنڈے دماغ سے سوچنا چاہیے، پاک بھارت جنگ ایٹمی جنگ نہیں بننی چاہیے، اگر ایسا ہوا تو بہت نقصان ہوگا۔
انہوں نے کہا کہ ہم دونوں ممالک کی جنگ میں مداخلت نہیں کر سکتے لیکن ہاں امریکا سفارتکاری کا راستہ اختیار کر سکتا ہے۔
اس سے قبل جمعرات کو وزیر اعظم شہباز شریف سے امریکی وزیر خارجہ مارکو روبیو نے رابطہ کیا تھا، امریکی وزیر خارجہ نے پاکستان اور بھارت دونوں کو کشیدگی کم کرنے کیلیے مل کر کام کرنے کی ضرورت پر زور دیا۔
