لندن: پاکستانی ہائی کمشنر محمد فیصل نے کہا ہے کہ پہلگام واقعے میں جو بھی ملوث ہو اسے سزا دی جانی چاہیے، پاکستان نے پہلگام واقعے کی عالمی سطح پر آزادانہ شفاف تحقیقات کا مطالبہ کیا ہے۔
تفصیلات کے مطابق برطانیہ میں پاکستانی ہائی کمشنر ڈاکٹر محمد فیصل نے برطانوی میڈیا کو انٹرویو دیتے ہوئے پاک بھارت جنگ بندی کے لیے امریکا، سعودی عرب اور دیگر دوست ممالک کے کردار کو سراہا۔
انھوں نے کہا پاک بھارت جنگ بندی کے لیے امریکا نے بہترین کردار ادا کیا، سعودی عرب اور دیگر دوست ممالک نے بھی اس سلسلے میں اپنا کردار ادا کیا، خطے میں دیرپا امن کے لیے مسئلہ کشمیر کا حل ضروری ہے۔
آج پورے ملک میں یوم تشکر منایا جائے گا، وزیراعظم
محمد فیصل نے کہا پاکستان پہلگام واقعے کی عالمی سطح پر آزادانہ شفاف تحقیقات کا مطالبہ کرتا ہے، پہلگام واقعے میں جو بھی ملوث ہو اسے سزا دی جانی چاہیے، ایسا نہیں ہو سکتا کہ آپ خود جج بنیں اور فیصلہ کر کے بمباری شروع کر دیں، پہلگام واقعے کی تحقیقات میں پاکستان تعاون کرے گا۔
واضح رہے کہ بھارت کے خلاف آپریشن بنیان مرصوص کی زبردست کامیابی اور بھارت کی شکست کے بعد ملک کے مختلف شہروں میں جشن منایا گیا، وزیر اعظم شہباز شریف نے آج ملک بھر میں یوم تشکر منانے کا اعلان کیا ہے۔
وزیر اعظم کا کہنا تھا یہ دن اللہ رب العزت کے حضور سجدہ شکر بجا لانے کا ہے، افواج پاکستان کی بے مثال بہادری کو خراج تحسین پیش کیا جائے گا، یوم تشکر پوری قوم کے حوصلے اور وحدت کو سراہنے کے لیے منایا جائے گا۔
