اسلام آباد: وزیرِاعظم نواز شریف نےکہا ہے کہ کراچی میں دہشتگردوں اور عسکریت پسندوں کے خلاف آپریشن قومی مفاد میں کیا جارہا ہے۔

اراکین اسمبلی سے ملاقات میں وزیرِاعظم نے کہا کہ کراچی میں آپریشن شروع کرنے سے قبل تمام سیاسی جماعتوں کواعتماد میں لیا گیا تھا، معاشی حب کو پُرامن اور مستحکم بنانا ملکی مفاد میں ہے۔

وزیرِاعظم نے کہا کہ غیر قانونی ہتھیار رکھنے کا کسی کے پاس کوئی جواز نہیں، سنگین جرائم میں ملوث ملزمان کو کٹہرے میں لایا جائے گا۔

نوازشریف نے کہا کہ اتفاق رائے سے شروع کئے گئے آپریشن کے بعد کراچی کی صورتحال میں بہتری آئی ہے، ٹارگٹ کلنگ، اغواء اور بھتہ خوری کے واقعات میں کمی آئی ہے۔

انکا مزید کہنا تھا کہ پاکستان میں دہشتگردی کی کوئی گنجائش نہیں، حکومت کو بہت سے چیلنجز کا سامنا ہے، جمہوریت کی بحالی کیلئے بھاری قیمت ادا کی ہے۔

Comments